Towarstwo móže swoje projektowe dźěło za dźěći a šulerjow pohłubšić

Rowno (AK/SN). Rownjanski Njepilic statok, hdźež serbsku rěč, tradicije, nałožki a stawizny zachowaja, je loni rekord wopytowarjow registrował. Tole wuzběhny předsyda towarstwa Manfred Nikel pjatk na hłownej zhromadźiznje. „Dokelž naša kulturna managerka Petra Schubertowa wopytowarjow swědomiće zapisuje, móžachmy dokładnje 5 275 hosći witać. Telko wopytowarjow w stawiznach swojeho towarstwa hišće ženje njemějachmy“, rjekny Nikel w swojej rozprawje. Wopy­towarjo přichadźachu z cyłeje Němskeje, z Belgiskeje, ze Šwicarskeje a samo z USA. Towarstwo organizowaše wodźenja z mjeńšimi a wjetšimi skupinami. Často wopytowarjo tež spontanje na statok přichadźachu. „Kedźbujemy na to, zo serbskich zajimcow serbsce po statoku wodźimy“, praji Manfred Hermaš, kiž je ­towarstwo 1999 sobu załožił. „Wodźenja su móžne hornjoserbsce, delnjoserbsce a w Slepjanskej serbšćinje.“