Kaž kóžde lěto w měrcu planuja tež lětsa po wšej Němskej dźeń wotewrjenych hornčernjow. Sobotu a njedźelu, 8. a 9. nalětnika, wot 10 do 18 hodź. hornčerjo zajimcow do swojich dźěłarnjow přeprošeja. Lětsa chce po cyłym Zwjazku něhdźe 520 hornčerskich zawodow a ateljejow wopytowarjam durje wotewrěć, w Sakskej samej je jich hižo 60. Tež w hornjołužiskich hornčernjach móžeće mnohostronskosć žiweho rjemjesła z najwšelakorišim rukopisom wobdźiwać. Po nazhonjenjach wopytuja zajimcy na tutymaj dnjomaj wjacore zawody.
Hornčerstwo je jedne z najstaršich rjemjesłow. Hižo před 8 000 lětami dźěłachu ludźo na hornčerskej tačeli. Tež dźensniše zhotowjenje drje hišće na staru tradiciju dopomina, ale produkt je so dospołnje přeměnił. Dźensa je keramika jara indiwidualny wudźěłk. Z dnjomaj wotewrjenych duri chcedźa rjemjeslnicy wopytowarjam pokazać, kelko prócy woni za sudobjo w ručnym dźěle nałožuja.
