Slepo (AK/SN). Nowotwar Rownjanskeje Witaj-pěstowarnje „Milenka“ je nimale zakónčeny. Twarske dźěła su dlěje trali, hač bě to nošer, Slepjanska gmejna, planowała. Nawoda zarjada za planowanje, twarjenje a hórnistwo w zarjadniskim zwjazku Slepo Steffen Seidlich informowaše wčera wječor na posedźenju gmejnskeje rady, zo chcedźa pěstowarnju 3. a 4. julija wotewrěć. Wot 7. julija změja dźěći tam swój domicil. Poprawom chcychu hižo před měsacom přećahnyć. Nažel njeje so to insolwency předewzaća dla radźiło. Tuchwilu staja dźěłaćerjo płót a kładu plester. Za dwě njedźeli ma sucho­twar dokónčeny być. Na městnje su tež molerjo, kładźerjo kachlicow, elektrikarjo, twarcy tepjenja a sanitarnych připrawow. „Smy zwěsćili, zo je so tež njedźelu dźěłało, za čož je dowolnosć trěbna“, Steffen Seidlich rozłožowaše. W techniskim wuběrku gmejny Slepo je planowanski běrow wo tym informował. Twar noweje pěstowarnje je trěbny. Aktualna ležownosć z pěstowarnju je jamje Wochozy přebliska. „Za rewitalizaciju serbskeje rěče“, tak wjesnjanosta Jörg Funda (CDU), „je pěstowarnja přewšo wažna.