Gmejnscy radźićeljo maja wjele njerozrisanych naležnosćow na blidźe

Njeswačidło (JK/SN). Napjata atmosfera knježeše na wčerawšim posedźenju Njeswačanskeje gmejnskeje rady. Ze zahajenej konsolidaciju běchu radźićeljo někak zlemjeni. Wěsta bjezradnosć knježeše při wotdźěłanju dnjoweho porjada, kotryž wšak w zjawnym dźělu tak wobšěrny njebě. Hižo we wobłuku wobydlerskich naležnosćow so wjetši problem gmejny jewješe. Zastupjer wohnjoweje wobory skedźbni na hižo dlěje znatu naležnosć wokoło jězdźidłow wobory. Planowane bě, zo dóstanje Njeswačanska wobora nowe jězdźidło. Něhdyše – stary W 50 –, kotryž tuchwilu na ryćerkuble steji, póńdźe hromadźe z tuchwilnym awtom z Njeswačidła do Zarěča. Tam maja stare 30lětne awto, kotrež ma wjac reparaturow hač je hišće hódne. Nimo toho móže přemało wobornikow z awtom sobu na zasadźenje jěć. Tuž je nuzne rozrisanje trěbne. Te chcedźa na wuradźowanju techniskeho wuběrka kónc apryla namakać.