Worklecy (SN/Žu.) Móst mjez Worklecami a Lejpoldom ma so hišće do jutrow sporjedźeć. To su radźićeljo Worklečanskeje gmejny wčera jednohłósnje wobzamknyli. Móst su loni za wobchad zawrěć dyrbjeli, dokelž hižo wěsty njeje. Trěbny pak wón je, a to nic jenož za šulski bus Róblec předewzaća, kotryž ma wokołopuća dla wjace wudawkow.

Za wuporjedźenje mosta liči gmejna z wudawkami hač do 15 000 eurow. Hač do přichodneje srjedy maja firmy we wobmjezowanym wupisanju swoje poskitki zapodać. Radźićeljo wjesnjanostu Clemensa Poldracka wčera społnomócnichu, zo smě nadawk za skowanske dźěła potom bjez dalšeho komdźenja wudać, zo by móst, kotryž tež někotři křižerjo wužiwaja, k jutram hotowy był.

Poprawom bychu nowy móst twarić dyrbjeli. Wudawki we wobjimje 100 000 eurow pak gmejna sama njesć njemóže. Tuž chcedźa so wo městno na prioritnej lisćinje Budyskeho wokrjesa prócować, štož by jim spěchowanje we wobjimje 75 procentow wunjesło. Šansu na to pak maja najzašo za dwě lěće.