Spěchowanski kruh za serbsku ludowu kulturu jutrowne wiki zarjadował

Budyšin (CS/SN). Wuměłsce wudebjene jutrowne jejka su nadal jara požadane. Minjenu sobotu stejachu hižo na zažnym dopołdnju syły zajimcow, kotrež běchu zbliska a zdaloka přichwatali, kołowokoło blidow dohromady 33 debjerkow a debjerjow jejkow na jutrownych wikach w Serbskim domje. Tući hosćom wutrajnje na tójšto prašenjow wotmołwjachu a jim wězo tež wšelake techniki debjenja na městnje předstajichu. Hižo měsacy dołho wšak běchu so woni na podawk přihotowali a tójšto jejkow wudebili, kotrež nětko na předań poskićachu. Najwjace jejka wudebjacych ludowych wuměłcow běše na žurli Serbskeho domu zhromadźenych.