Sociokulturny centrum w Běłej Wodźe dźěłowu rozprawu podał

Běła Woda (AK/SN). Běłowodźanski sociokulturny centrum, kotryž ma swoje sydło na ležownosći něhdyšeje škleńčernje Telux, prócuje so wo mnohostronske dźěćace, młodźinske, šulske, kulturne a socialne dźěło. Tole podšmórny Christian Klämbt, předsyda towarstwa Mo­bilne młodźinske dźěło a sociokultura, w swojej rozprawje na zašłym posedźenju měšćanskeje rady. „W zašłych sydom lětach smy dźakowano spěchowanju ze stron Zwjazka a Swobodneho stata do­hromady 270 000 eurow inwestowali. Obligatoriskich dźesać procentow swójskeho podźěla smy sami zwjesć móhli“, wón podšmórny. Ze stron zwjazka Kulturny rum Hornja Łužica/Delnja-Šleska je towarstwo loni cyłkownje 98 000 eurow projektneho spěchowanja dóstało.