Porchowska kupjel pod hołym njebjom je jedna z najwoblubowanišich w Budyskim wokrjesu. Loni wopyta ju dohromady 36 000 kuparjow. Gmejna chce kupjel nětko dale wuwić a wutwarić.

Porchow (UM/SN). Z ličbami wopytowarjow Porchowskeje kupjele so ani kupjel w susodnych Biskopicach, ani Sprjewina kupjel w Budyšinje, ani Kumwałdska kupjel měrić njemóža. Gmejna Porchow chce ju nětko modernizować a wutwarić. Za to je wobtwarjenski plan naćisnyła. Po tutym natwarja na sewjernym dźělu parkowanišća dźesać campingowych móžnosćow. Dotal wužiwaja přestrjeń jenož jako přidatnu parkowansku móžnosć w padźe wulkeho nawala wopy­towarjow. „Hódnoty imisijow na par­kowanišću su hladajo na nowy zaměr wužiwanja moderatne, tež dodźerženje nócneho měra za hosći zaručimy“, rěka w planje. Hla­dajo na wysoku potrjebu energije a na wysoke wudawki w zwisku z tym, insta­luja a wužiwaja w přichodźe w kupjeli ­fotowoltaikowu připrawu. Nimo toho chcedźa zamołwići za wopytowarjow ­nabiwanske stacije za e-biki natwarić.