Ławki w Kinajchće we wobydlerskim etaće najčasćišo mjenowane

Wojerecy (SN/MWj). Za wobydlerski etat města Wojerecy za tele lěto je 139 wosobow cyłkownje 161 namjetow zapodało. Byrnjež rytmus a pjenježny wobjim změnili, bě zajim wobydlerjow podobny ­zašłym lětam, měšćanske zarjadnistwo zdźěli. W lěće 2023 je 106 namjetow ­dóšło, lěto do toho bě jich 137.

Mjez 161 zapodaćemi su štyri namjety z identiskim wobsahom. Tute buchu tři, šěsć, sydom a samo 56 razow zapodate, štož cyłkowny wobraz trochu skomoli. Hdyž wot wjacorych wosobow zapodate namjety wufiltruješ, předleži dohromady 93 wšelakich idejow za naprawy we wobłuku wobydlerskeho etata. Najčasćišo ludźo namjetowachu, na nawsy w Kinajchće rustikalne drjewjane ławki nastajić. ­Dale přeja sej ludźo před wjedrom škitacu budku při busowym zastanišću w Ćisku. Sydom rozdźělnych idejow wěnuje so wólnočasnemu kompleksej Wuchod. Tež za bliskowočerstwjenišćo w Brětni wjacore namjety dóńdźechu. Za zwoprawdźenje projektow steji we Wojerecach samych 75 000 eurow k dispoziciji, w kóždym z pjeć wjesnych dźělow pak 5 000 eurow.