Slepo (JoS/SN). Ze 26. serbskimi wikami jutrownych jejkow bě Slepo minjeny kónc tydźenja jedyn z najwjetšich wopytowarskich magnetow we Łužicy – runje tak kaž w zašłych lětach. Hižo sobotu dopołdnja hosćo do Serbskeho kulturneho centruma (SKC) přichadźachu, jako wiki scyła hišće wotewrjene njeběchu. Přiwšěm smědźachu sej woni wšitko wobhladać, wšako mějachu debjerjo a wikowarjo swoje stejnišća hižo natwarjene. Hołk a tołk na woběmaj dnjomaj njepopušći.
Zwjeselace, zo běchu mjez debjerjemi nowe wobliča. Mjez dorostom běštej młodej žonje z Mikowa: Rita Schletze a Lisa Sachse. W zašłosći běštej so hižo jeju maćeri na wikach wobdźěliłoj, Beatris Sachse tež lětsa. Sachsec mać a dźowka běštej lětsa znowa mjez wuznamjenjenymi wubědźowanja wo najrjeńše serbske jutrowne jejko. Napadnyła je tónraz wěsta nowa kreatiwnosć. Tak běchu pinkbarbne jejka ze serbskimi mustrami wudebjene. Tež motiwy po wšěm zdaću žane hranicy njeznajachu. Mnozy wopytowarjo sej tajke a hinaše debjene jutrowne jejka kupichu.
