Radwor (SN/MkWj). Gmejnsku zhromadźiznu hinašeho razu móžachu woleni zastupnicy Radworskeje gmejny a hosćo minjenu srjedu w sydarni swojeho gmejnskeho zarjada dožiwić. Dokelž njebě wjesnjanostka Madeleine Rynčowa přitomna, zastupowacy wjesnjanosta Maik Wirrig wuradźowanje nawjedowaše, kotryž wšak tajke dźěło zwučeny njeje.

Hižo dnjowy porjad pokaza, zo so zasadnych problemow gmejny přimać nochcedźa. Tak su hnydom štyrjoch nawodow wjesnych woborow w zastojn­stwje wobkrućili, kotrychž běchu wohnjowi wobornicy mjez sobu wuzwolili.

Zastupowacy wjesnjanosta wo tym informowaše, zo su přepytowanje fachowče nastupajo muchi w krajnoradnym zarjedźe wuhódnoćili. Jako sćěh toho su nětko tak mjenowany monitoring muchow zahajili, kotryž ma hač do kónc ­oktobra trać. Wobydlerjo protokoluja wšědnje daty, zo móhli na jich zakładźe skónčnje zwěsćić, zwotkal muchi woprawdźe přińdu. Inwazija muchow ludźi stajnje zaso znjeměrnja. Wobzamknyli su tež dalše wudawki k wobstaranju dweju noweju jězdźidłow wohnjoweje wobory.