Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (55)

Nowoseelandska, Jendźelska abo Awstralska su nam znate kraje, w kotrychž dźensa hišće na tradicionalne wašnje wowcy plahuja. Stadła skotu zežiwjeja so na pastwach a ćahnu po tym dale na přichodny płódny blečk, hdźež móža so nasyćić. We wonych krajach pak schorja kóžde lěto tysacy wowcow na tak mjenowanu hniliznu panochtow (Moderhinke). W Šwicarskej su wobsedźerjo stadłow ­loni wobšěrne programy startowali, zo bychu chorosć wutupili. Tam so wowcy w kóždym štwórtym stadle z wonej chorosću bědźa.