Němsko-serbske nalětnje wiki dobry wothłós žnjeli

Stróža (CS/SN). Z ličbu wopytowarjow němsko-serbskich nalětnich wikow přirody w Stróži minjenu sobotu móže nawoda biosferoweho rezerwata Hornjołužiska hola a haty Torsten Roch bjeze wšeho spokojom być. 4 200 je dobry přerězk. Wažniše hač ličby pak jemu je, zo su wopytowarjo a wustajerjo spokojom. A to sy z wobličow wšitkich wobdźělenych wučitać móhł. Tež derje pjelnjene nakupowanske toboły wo tym swědčachu. Zwjetša su sej ludźo wšitke móžne rostliny za swoju zahrodku wobstarali. Zastupjer turistiskeho poradźowanja Futour Georg Thieme chcyše to dokładnje wědźeć. Tuž wopytowarjow prošeše, na někotre prašenje wo biosferowym rezerwaće wotmołwić. Tajke naprašowanje UNESCO kóžde dźesać lět přewjeduje. Wjace hač 50 wupjelnjenych naprašnikow na kóncu zličichu. Na te wašnje chcedźa měnjenje wobydlerjow wo biosferowym rezerwaće zhonić.