Kónc septembra přewjedźechu w Njebjelčicach pola tamnišeje sportoweje jednotki hłownu a wólbnu zhromadźi­znu (Serbske Nowiny rozprawjachu). Ze Serbskopazličanom Frankom Domšom maja noweho prěnjeho muža. Z dotalnym předsydu Bjarnatom Deleńkom je so wnučk Theodor Wajdlich rozmołwjał.

Kak dołho wobsteji hižo SJ Njebjelčicy?

B. Deleńk: Naša sportowa jednotka bu 8. Nowembra 1957 załožena. Potom je mustwo tři lěta dołho w Hlinowcu hrało, doniž njebu naše hrajnišćo w Njebjelčicach 1960 wotewrjene.

Sy sam tež kopańcu hrał?

B. Deleńk: Haj, sym sam jako šuler w teamje za dorost w Njebjelčicach kopał. Zranjenja w lěće 1964 dla njemóžach wjac kopańcu hrać.

Kak přińdźe zo je SJ Njebjelčicy tebje za prezidenta wuzwoliło?

B. Deleńk: Hačrunjež dyrbjach hižo zahe přestać hrać, běch přiwšěm jara wusko zwjazany z našej SJ. W času, jako bě mój předchadnik Křesćan Ričel tu w Njebjelčicach hišće prezident, sym hižo w předsydstwje sobu skutkował. 1999 wuzwolichu mje za prezidenta. Nětko po 25 lětach chcych tutón čestny nadawk rady dale dać.

Što bě najwjetši wjeršk w twojim času skutkowanja?