Awtor dźensa

Jan Hrjehora

Šulski nawoda Wyšeje šule Slepo bě sej w juniju 2024 na poslednim šulskim dnju před wulkimi lěćnymi prózdninami při rozžohnowanju ze swojim šulerstwom a kolegijom wospjet dowolowe pohladnicy přał, a to na adresu tamnišeho kubłanišća. Spočatk awgusta nawoda šule nowych šulerjow, wučerjow a tež dotalnych chowancow zaso na šulskim dworje witaše. Při tym dźeržeše dwaj ducentaj pisanych dowolowych postrowow w ruce. Wone běchu puć do Slepoho z najwšelakorišich kóncow z tu- a wukraja namakali. Tak na přikład z pólskeho Karpacza, z němskeje stolicy Berlina abo wot italskeho Lago Maggiore. Wosebje horda běše fachowa skupina serbšćina na šulerki a šulerjow, kiž běchu postrowy serbsce napisali.