Nětko hižo sedmy raz wotmě so minjenu sobotu w Rakecach koparski turněr młodźiny F a D. Wuhotowar turněra je energijowy zawod EVSE ze Salowa. Wón wubědźowanje stajnje něhdźe druhdźe přewjeduje.
Při najrjeńšim lětnim wjedrje wojowachu młodźi koparjo wo dypki, medalje a pokale. We woběmaj starobnymaj klasomaj wobdźělichu so cyłkownje štyri mustwa. Kóždy hraješe přećiwo kóždemu, a to w dwěmaj kołomaj. Bohužel pak su krótkodobnje tež cyłki wotprajili. Turněr pak bě wuběrnje organizowany, a dźěći běchu ze wšěm jara derje zastarane.
Pola młodźiny F so Njebjelčanski cyłk ze 16 dypkami jasnje přesadźi. Jako najlěpšeho hrajerja wuzwolichu Kiliana Cyža z dobyćerskeho mustwa. Tež dalši titul wudoby sej serbski kopar. Jan Šmit z Chróšćanskeho cyłka dósta za wuběrne refleksy pokal najlěpšeho wrotarja. A jeho bratr Ben dźeržeše runje tak pokal w rukomaj. Wón bě mjenujcy najmłódši hrajer turněra.