W serbskim žiwjenju Malešanskeje kónčiny je Alfred Worjech z Brězyny pola Hućiny legenda. Bjez dźiwa, zo pohnu tu młodych telewizijnikow SAEK w Budyšinje před lětom, wo nim portretowy film nawjerćeć. Tak je tón, kiž wjelelětneho Domowinjana Alfred Worjecha hišće njeznaješe, zeznał muža serbskeje kreje a duše.

1. decembra 1925 bě so Alfred Worjech w Brězynje narodźił. Nan měješe šěsćhektarske ratarstwo, a tuž bě za młodeho Alfreda po wuchodźenju Hućinjanskeje šule samozrozumliwe, sej powołanje w ratarstwje pytać. Zakónči wukubłanje na ratarskej šuli. Z přirodu zwjazany dyrbješe pak najprjedy do fašistiskeje dźěłoweje słužby RAD na kupje Sylt a po tym tež do němskeje Wehrmachty. Přizamkny so wójnska jatba w Jendźelskej. Skónčnje doma bu ratar a aktiwny čłon Domowinskeje skupiny w Hućinje. Woženi so z dźowku šleskeho přesydlenca Hertu, a jimaj narodźi so pjeć dźěći. Worjech­ wosta, štož w młodosći běše, horliwy Serb.