Nic jenož minjenu sobotu na dźěćacych póstnicach a samsny dźeń na kapičkowym wječoru knježeše w Njebjelčanskej „Bjesadźe“ dobra nalada, ale tež wječor do toho. Tam su so nory na žonjace póstnicy zetkali. Kaž je hižo někotre lěta z wašnjom, mějachu žony Serbskopazličanskeho karnewaloweho towarstwa program spřihotowany.

Lětsa běchu po puću z lětadłom „WCV airline“ a hesło rěkaše „We wosom mjeńšinach wokoło swěta“. Po zaćahu žonow z jich kóframi kapitan-pilot na lóštne wašnje wěstotne naprawy rozjasni. Jako prěnje poda so lětadło na čorny kontinent. K afriskim rytmam hibachu so žony na cebry předrasćene. Dale wjedźeše jězba do Ruskeje, hdźež zarejwachu matrjoški. Na južnym čopje wuhladachu přihladowarjo lodoweho bara a pinguina. W Mexiku wustupi hudźbna skupina z wulkimi sombrerami a pončowami. Skónčnje zarejwachu tež hišće indiske rjanolinki w swojich frinkolacych šatach a kanadiscy cowboyjojo. Přizemjenje doma we Łužicy bě potom finale, w kotrymž sej „šewca“ zarejwachu.