Dźesać ćěkancow na integraciskim projekće wobdźělenych
Njebjelčicy (SN/mwe). W Njebjelčanskej integraciskej – bywšej socialnej – dźěłarni je tuchwilu dźesać požadarjow azyla a připóznatych ćěkancow do projekta k namakanju dźěła na prěnich dźěłowych wikach zapřijatych. Nošer předewzaća je Kamjenska kubłanska towaršnosć. Jako stoprocentna dźowkowa towaršnosć Budyskeho wokrjesa je wona na zakładźe wobzamknjenja Němskeho zwjazkoweho sejma ministerstwo za zežiwjenje a ratarstwo zdobyła, zo by naprawu wosebje pjenježnje spěchowało.
„Lětsa kónc januara smy prěni přechod, tohorunja z dźesać wobdźělnikami, wuspěšnje zakónčili. Młody Afghaničan je krute dźěło namakał, dalši su časowje wobmjezowanje přistajeni abo su so za kursy k nawuknjenju němčiny rozsudźili“, jednaćelka Kamjenskeje kubłanskeje towaršnosće Anja Geißler našemu wječornikej zdźěli.
