Judit Šołćina, Hartmut Leipner, Julian Nyča a Felicia Touvenot su delegaća

Budyšin (SN/mb). Dźensa so čas přizjewjenja za lětuši kongres FUEN skónči. Třěšny zwjazk domoródnych narodnych mjeńšin po cyłej Europje wotměje swój 67. kongres w južnej Madźarskej. Hosćićel je krajne samozarjadnistwo madźarskich Němcow. Městnosć zeńdźenja wot 7. do 10. požnjenca je Fünfkirchen/Pécs (madźarsce)/Pečuh (chorwatsce). Kaž našemu wječornikej na naprašowanje referentka Domowiny Madlenka di Sarnowa zdźěli, je narodna organizacija Serbow štyrjoch delegatow našeho ludu přizjewiła. Do serbskeje delegacije słušeja hłowna jednaćelka Domowiny Judit Šołćina, městopředsyda z Delnjeje Łužicy dr. Hartmut Leipner a Julian Nyča, wot spočatka měsaca wědomostny sobudźěłaćer na projekće ZARI za rewitalizaciju serbšćiny. A jako zastupjerka serbskeje młodźiny resp. towarstwa PAWK Felicia ­Touvenot, kotraž je zdobom čłonka prezidija MENS, młodźina europskich narodnych mjeńšin.