Blue Devils Weiden –

Łužiske lodohokejowe liški 1:2 (0:1, 1:1, 0:0)

Blue Devils Weiden běše w prěnjej třećinje postajowace mustwo a sadźeše Liški wot spočatka sem pod ćišć. Z agresiwnym pressingom zadźěwachu domjacy efektiwnemu natwarej hosći. Přiwšěm docpěchu prěnje wrota partije ći módro-žołći w 19. min. Sebastian Zauner přewiny z třělwu z módreje linije poslednjeho muža hosćićela.

Wurunanje docpě Lukas Gläser spočatk srjedźneho wotrězka. Wot chłostanskeje ławki přišedši hrabny sej hrajny nastroj a přetwori w 24. min. sam na wrotarja smykajo k 1:1. Liški pak wobkrućichu swoju rólu faworita, jako krótko po tym Marlon Braun z třělwu z módreje linije wospjetne nawjedowanje k 2:1 docpě. Wrota pak buchu Ericej Valentinej­ přiličene, dokelž bu třělwa wotfalšowana. Weiden postajowaše naslědnje hru, njedocpě pak dalše wrota.

Tež w kónčnym wotrězku so na hrajnym stawje ničo wjac njezměni. Hosćićeljo spytachu ze spěšnymi akcijemi wurunanje docpěć. Běła Woda pak nadběhi přećiwnika jara sylnje zakitowaše, a to zdźěla z hrajerjomaj mjenje na lodźe­.