Serbski medicinar-wědomostnik a nan šěsć dźěći prof. dr. Klaws Thielmann swjeći zajutřišim swoje dźewjećdźesaćiny w Erfurće. Narodźił je so 1933 w Połčnicy, hdźež měještaj jeho serbska mać a jeho němski nan zhromadnu lěkarsku praksu. Tam zastupi do šule a chodźeše na to na Lessingowy gymnazij w Kamjencu. Jako hólčec wopytowaše wón rady swojeho dźěda Mikławša Kubaša a swoju ćetu Marju Kubašec w Chasowje. Dźěd njeje z wnučkom jeno zaměrnje serbował, ale w nim tež luboznje zajim za serbske stawizny a přirodu zbudźił. „Rady podach so z kolesom z Połčnicy do Chasowa a připosłuchach napjeće dźědej. Wón mi ptače mjena, ratarske a druhe wopřijeća serbsce posrědkowaše. Chasow sta so z mojej domiznu. Tam přebywajo čuju so hišće dźensa swobodnje a napjelnjeny z čerstwym powětrom“, rjekny jubilar.