Pjatk tydźenja je towarstwo Serbska murja za swój angažement na dobro serbskeje rěče Myto Domowiny za dorost přijimało. Mjez mytowanymi čłonami towarstwa běše tež 24lětny rodźeny Chróšćan Syman Sćapan. Milan Pawlik je so z nim rozmołwjał.

„Serbska murja“: Čehodla sće towarstwo załožili? Čehodla sće sej runje tute mjeno wuzwolili?

S. Sćapan: Jako skupina namakali smy so w lěće 2016 na swětowym zetkanju młodźiny w Krakowje. Tu je tež ideja mjena nastała. Jako njesechmy pjeć młodostnych serbsku chorhoj we wulkim formaće w ćahu přez wuske haski Krakowskeho stareho města, je nas naš přewodnik kapłan Florian Mróz jaku pochodowacu „serbsku murju“ wopisał. To je so nam lubiło a tak smy zapřijeće jako mjeno towarstwa rady přiwzali.

Móžeš nam zaměry towarstwa a konkretne projekty tróšku bliže předstajić?