Španiske narodne koparske mustwo steji štwórty raz w finalu europskeho mišterstwa. W połfinalu přećiwo Francoskej w Mnichowje dobychu Španičenjo 2:1 přez wuběrnu třělwu Lamine Yamala (21.) a dalše wrota Danija Olma (25.). Do toho bě Randal Kolo Muani Francosku k nawjedowanju zhłójčkował (8.). Španiska je tak prěnje mustwo w stawiznach europskich mišterstwow, kotrež je šěsć EM-hrow za sobu dobyło.

Nětko faluje Španiskej jenož hišće jedne dobyće za štwórty EM-titul. To by był dalši nowy rekord. Aktualnje su Španičenjo z třomi titulemi hišće zhromadnje z Němskej na čole wšěch dobyćerjow EM. Na turněrach 1964, 2008 a 2012 dobychu Španičenjo, 1984 přěhrachu w finalu přećiwo Francoskej.

W kónčnej hrě hraje Španiska přećiwo Nižozemskej abo Jendźelskej. Druhe połfinale dźensa wječor 21 hodź. w telewizijnym sćelaku ARD wusyłaja.