Wojerecy. Wot spočatka lěta płaći we Wojerecach směrnica wo witanskim pjenjezu za nowonarodźene dźěći. Po njej wupłaća kóždemu dźěsću, kotrež je so po 1. juliju 2017 narodźiło, 250 eurow. Wuměnjenje je, zo bydli dźěćo w domjacnosći staršeju resp. zastaraćelow, kotřiž su znajmjeńša tři měsacy do poroda dźěsća we Wojerecach přizjewjeni, a zo su so přepytowanja U1 hač do U6 dospołnje a sčasom přewjedli. Trěbne formulary za to dóstanu starši we wobydlerskim běrowje na Dillingenskej abo na internetnej stronje Wojerec, rěka w zdźělence měšćanskeho zarjadnistwa.
Na słowjansku nóc
Lipsk. Słowjanska zymska nócna party wotměje so sobotu, 17. februara, wot 18.30 hodź. w Lipšćanskej kulturnej kofejowni „Knicklicht“ na Drježdźanskej dróze 79. Chór Slavia předstaji ruske, pólske a ukrainske ludowe pěsnje, kapała Kupazukow hraje serbsku rejwansku hudźbu, jej poboku je dalša pólska kapała. Wšitcy zajimcy su wutrobnje přeprošeni sobu rejwać, spěwać a so po słowjanskim wašnju zabawjeć. Organizatorojo wjesela so na bohate wobdźělenje.
Hórki. Štóž chce sej zaso raz słódne dobroty ze swinjorězanja popřeć, móže to sobotu, 17. februara, w Hórčanskim Młynkec hosćencu. Tam krupjane a całtowe kołbasy kaž tež połćik a wšo dalše předawaja. Nimo toho přeprošeja Młynkecy njedźelu, 18. februara, wot 12 hodź. na Walentinowy brunch.
Radźićeljo so zetkaja
Worklecy. Wohnjoškitne naprawy na wyšej šuli „Michał Hórnik“ budu jedna z temow posedźenja Worklečanskeje gmejnskeje rady jutře, štwórtk, w 19 hodź. w šuli. Dale zaběraja so z nowym hortowym twarjenjom a z naćiskom twarskeho plana za přemysłowu přestrjeń Nowa Wjeska-zapad II. Posedźenje je zjawne, zajimcy su přeprošeni.
Sčasom na dźěłarničku přińć
Budyšin. W zwisku z dźěłarničku „Rjekojo z pjelsća“ sobotu, 17. februara, wot 10 do 18 hodź. skedźbnja Budyski Serbski muzej na to, zo je radźomne sčasom na dźěłarničku přińć, zo by chwile dosć było klanku dokónčić. Čim wjace časa za jeje wuhotowanje je, ćim lěpje.
Budyšin. Mnoho naprašowanjow dla je so Serbski ludowy ansambl rozsudźił, poskićić přidatne předstajenje swojeho wuspěšneho wječorneho ptačokwasneho programa „Po serbskich slědach“, a to njedźelu, 11. februara, w 19.30 hodź. na žurli SLA. Zastupne lisćiki dóstanu zajimcy při wječornej kasy. Předstajenja jutře w 16 a 19.30 hodź. kaž tež njedźelu w 16 hodź. su wupředate.
Kružk pisacych w hospodźe
Chrósćicy. Wosom čłonow wopřijmje Róžeńčanski kružk pisacych, kotřiž pod nawodom spisowaćela Bena Budarja prawidłownje swójske twórby pisaja. Lětsa kružk hižo swoje 55. narodniny swjeći a přeco hišće so z pjerow kreatiwne ideje wužórla. Hač do lěća ma samo nowa zběrka wuńć: „Zornjatka na puću“. Něštožkuli z tejele knihi budźe hižo słyšeć jutře, sobotu, w 19.45 hodź w Chróšćanskej putniskej hospodźe. Hobbyjowi poeća čitaja basnje a powědančka wo běhu lěta, zdźěla podpěrani wot młodeje generacije. Wo hudźbny přewod postara so čłonka kružka Marija Šołćina na gitarje.
Poskitk za prózdniny
Chrósćicy. Na póstniske zarjadowanje we wjacezaměrowej hali „Jednota“ přeprošeja Chróšćanscy młodostni a Smječkečanski Dom swjateho Jana wšitkich zbrašenych, jich přećelow a přiwuznych pjatk, 9. februara. Wot 18 hodź. chce diskotekar Frank wšěm noram z horcej hudźbu zapyrić. Organizatorojo wjesela so na bohate wobdźělenje.
Přednošuje wo Madźarskej
Budyšin. Do kotreho směra wuwiwa so Madźarska a kajki poměr ma kraj k Europskej uniji a k Němskej? Tajke a podobne prašenja steja w srjedźišću přednoška Daniela Hegedüsa jutře, štwórtk, we 18 hodź. w Budyskim Kamjentnym domje. Sakska krajna centrala za politiske kubłanje wječor zarjaduje. Daniel Hegedüs wuwučuje na Berlinskej Humboldtowej uniwersiće a so z madźarskej knježerstwowej politiku dokładnje zaběra.
Žony wulce swjeća
Njebjelčicy. Žonjace póstnicy Serbskopazličanskeho karnewaloweho towarstwa budu zajutřišim, 9. februara, wot 20 hodź. w Njebjelčanskej „Bjesadźe“. Program započnje so w 21 hodź. Wšitke žony, kotrež su hač do toho časa do „Bjesady“ přišli, dóstanu darmotnu škleńčku sekta.
Pančicy-Kukow. Sylwija Šěnowa, Dorothea Šołćina, Benedikt Dyrlich a Alfons Wićaz čitaja jutře, srjedu, w 19 hodź. w awli Šule Ćišinskeho w Pančicach-Kukowje z antologije serbskeje prozy „Mlóče“. Na zhromadne zarjadowanje Ludoweho nakładnistwa Domowina a Domowinskeje skupiny Pančicy-Kukow su zajimcy wutrobnje přeprošeni.
Poskitk za prózdniny
Horni Hajnk. Na serbskorěčne tematiske dny přeprošeja šulscy socialni dźěłaćerjo Rěčneho centruma WITAJ tež lětsa zaso w zymskich prózdninach wot 20. do 23. februara. W domje Jurja Brězana w Hornim Hajnku chcedźa so wot wutory do pjatka, stajnje wot 8 do 11.30 hodź. ze wšelakimi aspektami kedźbliwosće zaběrać a socialne kompetency dźěći z pisanym metodiskim poskitkom spěchować. Přizjewić móža so šulerki a šulerjo 3. do 6. lětnika hač do 9. februara z mjenom a starobu pod telefonowym čisłom 03591/ 550 400 abo e-mailnje pod adresu .
Wo zabytych twórbach
Kamjenc. Přichodne stajne blido Zelenych je jutře, wutoru, w 19 hodź. w Kamjenskim hosćencu „La Piazza“ na Zwingerowej 4. Jako hosća witaja rěčnicu krajneho předsydstwa Zwjazka 90/Zelenych Christin Melcher. Wona a předsydstwo regionalneje skupiny wjeselitej so na zajimawe rozmołwy.
Porodowu staciju zeznać
Kamjenc. Zajutřišim, 7. februara, w 19 hodź. su přichodni starši na informaciski wječork do Kamjenskeje chorownje maltezow přeprošeni. Na porodowej staciji Margareta budu nazhonite baby a sotry na prašenja samodruhich a jich mandźelskich wotmołwjejać. Přizjewjenje za to trěbne njeje.
Zetkaja so w stolicy
Berlin. Přichodne Serbske blido w Berlinje budźe štwórtk, 8. februara, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć. Wjelelětni wobdźělnicy su na nowych ludźi a jich ideje wćipni.
Jejka debić wuknyć
Njebjelčicy. Towarstwo za zachowanje mnohotnosće wužitnych rostlin a Njebjelčanska gmejna přeprošatej njedźelu, 4. februara, na třeću měnjensku bursu za symjo. Wona wotměje so wot 14.30 do 17 hodź. na žurli gmejnskeho zarjadnistwa. Tež štóž symjo ze swójskeho plahowanja sobu přinjesć njemóže, njesměł składnosć skomdźić, njeznate a rědke družiny symjenja zeznać a je za swójsku zahrodu wužiwać. W 15 hodź. přednošuje Thomas Noack wo permakulturje. Njebjelčanske towarstwa staraja so wo ćělne derjeměće hosći z kofejom a tykancom.
Wo wosobinach města
Budyšin. Wuznamne wosobiny, po kotrychž su Budyske hasy pomjenowane, steja w srjedźišću tematiskeho wodźenja njedźelu, 4. februara, w 15 hodź. w Budyskim měšćanskim muzeju. Pod hesłom „Heino, Löhr, Tzschirner a ...“ muzeologa Hagen Schulz někotre wuznamne wosobiny předstaji.
Dźěłarnju chcedźa wožiwić
Stróža. Po zymskej přestawce je wot dźensnišeho Stróžanski wopytowarski informaciski centrum biosferoweho rezerwata Hornjołužiska hola a haty Dom tysac hatow zaso přistupny. Hižo jutře, pjatk, w 17 hodź. wotewru jednu z lětušich třoch wosebitych wustajeńcow. W njej su widźeć mólby a paslenki, nastate loni we wobłuku dźěćaceho a młodźinskeho wubědźowanja Domowinskich župow Budyšin, Kamjenc a Wojerecy pod hesłom „Krabat 2.0“. We wobłuku wotewrjenja porěči biograf a genealoga Hans-Jürgen Schröter z Kulowa wo žiwjenju Johanna von Schadowitza (1624– 1704), kiž je jako Krabat do łužiskich stawiznow zašoł.
Zhromadnje štomiki spalić
Chrósćicy. Swój wusłuženy hodowny štomik móža Chróšćenjo njedźelu, 4. februara, jednorje a přijomnje wotbyć. Wohnjowa wobora wšitkich wobydlerjow přeproša, wot 16 hodź. při wohnjowobornej gratowni zhromadnje hodowne štomiki spalić. Wo ćělne derjeměće je postarane. Organizatorojo nadźijeja so bohateho wopyta.
Budyšin. Za wobdźělenje na rěčnym kursu čěšćiny w Praze wot 27. julija do 24. awgusta 2018 abo w Českich Budějovicach wot 20. awgusta do 7. septembra 2018 su stipendije k dispoziciji. Rěčny centrum WITAJ je posrědkuje. Zajimcy njech hač do 15. měrca w RCW swoje přizjewjenske podłožki wotedadźa (Póstowe naměsto 2, 02625 Budyšin, e-mail: ). Dokładne informacije su na internetnej stronje www.witaj-sprachzentrum.de přistupne.
Srjedź februara započnu twarić
Němcy. Ponowjenje statneje dróhi S 95 w Němcach započnje so 15. februara. Tole je twarska firma Strabag tele dny na prěnim wuradźowanju ze zastupjerjemi wuchowanskeje słužby, wohnjoweje wobory, nadróžneho wobchadneho zarjada a dalšich wobdźělenych firmow zdźěliła. Hladajo na póstniske zarjadowanja w Kulowje a zymske prózdniny su so na mjenowany termin dojednali. Tón dźeń započnu mjez Vincencowej hrjebju a Při Kummelec młynje štomy pušćeć, za čož statnu dróhu dospołnje zawru. Tohorunja 15. februara w 17 hodź. přewjedu za wobydlerjow informaciske zarjadowanje.
Budyšin. Sekcija hudźba Maćicy Serbskeje a Towarstwo za staru serbsku ludowu hudźbu přeprošatej štwórtk, 1. februara, w 19.30 hodź. do sydarnje Budyskeho Serbskeho domu. Tam budźe přednošk na temu „Přehlad a posudźowanje zběrkow serbskich ludowych spěwow“. Přednoškej přizamknje so rozmołwa wo mjenowanej temje.
Předstaja zběrku lyriki
Choćebuz. Zo njeje Bernd Pittkunings jenož nadarjeny spěwytwórc, ale tohorunja wuběrny znajer poezije, pokazuje nowa zběrka delnjoserbskeje lyriki „Basnikarska kjarmuša“. Kniha je do hód w Ludowym nakładnistwje Domowina wušła. Hromadźe z cejdejku ju nětko předstaja, a to štwórtk, 1. februara, we 18 hodź. w bibliotece Choćebuskeho Serbskeho domu. Wšitcy lubowarjo basnjow su wutrobnje přeprošeni.