Sobotu do lěsa
Ekumeniski póstny seminar
Smochćicy. Rjad zarjadowanjow lětušeho ekumeniskeho póstneho seminara pod hesłom „Wobchad z wohnjowymi murjemi – wotmjezowanje a mjeza“ zakónča póndźelu, 31. měrca, w 19.30 hodź. z filmowym wječorkom w Smochčanskim kubłanišću swjateho Bena. Zarjadowarjo wšitkich zajimcow wutrobnje přeprošuja.
Casting za Krabatowu sagu
Čorny Chołmc. Kulturny centrum Krabatowy młyn tzwr přeprošuje wšitkich, kotřiž rady spěwaja, rejuja abo dźiwadło hraja, na wulki casting za lětušu Krabatowu sagu „Z wodychom nawróta“. Na dworje Krabatoweho młyna pyta jury, kotrejž přisłušeja mjez druhim režiser Michael Kuhn a projektny nawoda Anton Fuchs, 5. apryla wot 11 hodź. za statistami a komparsami. Zhromadnje chcedźa k tomu přinošować, zo tež lětuša inscenacija znowa publikum zahori.
Wóskowanje jejkow nawuknyć
Wojuja wo pokal Domowiny
Radwor. Sobotu, 29. měrca, wotměje so 40. sokołski wolejbulowy turněr wo pokal Domowiny w Radworskej sportowej hali. Wubědźowanja zahaja so w 9 hodź.
Wušiwanje křižerskich seklow
Budyšin. Spěchowanski kruh za serbsku ludowu kulturu přeprošuje wšitkich zajimcow na kurs wušiwanja křižerskich seklow pod nawodom fachowče Delije Münchoweje. Zarjadowanje wotměje so pjatk, 28. měrca, w 16 hodź. w Budyskim Serbskim domje. Dalše informacije poda nawodnica spěchowanskeho kruha Rejzka Krügerowa pod čisłom 03591 550291.
Zhromadnje wotpadki zběrać
Pančicy-Kukow. Hižo štwórty raz přeprošuje Sportowe towarstwo Marijina hwězda wšitkich małych a wulkich wjesnjanow w Pančicach-Kukowje na zběranje wotpadkow a to sobotu, 29. měrca. Start je w 10 hodź při sportnišću. Měchi a rukajcy wobdźělnicy na městnje dóstanu. Nimo toho dóstanu tež mały přikusk k wobjedu.
Gmejnska rada so schadźuje
Pančicy-Kukow. Wjesnjanosta gmejny Pančicy-Kukow Markus Kreuz přeprošuje wšitkich zajimowanych wobydlerjow na zjawny dźěl posedźenja gmejnskeje rady a to štwórtk, 27. měrca, w 19 hodź. do něhdyšeje Wotrowskeje šule. Na dnjowym porjedźe steji mjez druhim diskusija wo hasnjenju nadróžneho wobswětlenja we wšěch wjesnych dźěłach gmejny.
Nalětnje spěwanje
Budyšin. Někotryžkuli Budyšan znaje krasnu přehladku kamelijow Steglichec zahrodnistwa. Hač do 10. apryla móža zajimcy w tutych tydźenjach krasnje kćějace rostliny wobdźiwać. Sobotu, 29. měrca, přeprošuje Hudźbny kruh Consonare swj. Pětra w 15 hodź. do zahrodnistwa na swój wustup, na kotrymž zanjese nalětnje pěsnje, je-li słónčne wjedro wonka, je-li so dešćuje, w rostlinarni. Zastup je darmotny.
Maćica Serbska přeprošuje
Na „Kofej w třoch“ do muzeja
Budyšin. Serbski muzej w Budyšinje přeprošuje srjedu, 26. měrca, w 15 hodź. na „Kofej w třoch“ wo temje „Swójbne slědźenje za započatkarjow“. Biskopstwo Drježdźany-Mišno je cyrkwinske knihi katolskich wosadow hač do lěta 1875 zjawnosći online spřistupniło. Nětko móže kóždy zajimc w katolskej Hornjej Łužicy za swójbnymi stawiznami slědźić. Na přikładźe swójskich rešeršow prezentuje referent Alexander Pólk přistup a wužiwanje zjawnych žórłow, pomocny grat za systematizowanje wuslědkow a tón abo tamny kuriozny zadźěwk při slědźenju.
Dalši casting za lěćne dźiwadło
Budyšin. Němsko-Serbske ludowe dźiwadło wuhotuje jutře, srjedu, dalši casting za lětušu inscenaciju pod hołym njebjom „Alice im Wunderland“. Wot 17 hodź. móža zajimcy w starobje znajmjeńša 18 lět we wulkim domje swoje rejowanske kmanosće předstajić. Wobknježić měli zakłady stilow modern dance, jazzowa reja a/abo neoklasiska technika. Proby zahaja so 28. apryla, předstajenja wotměja so wot 12. junija do 20. julija na Budyskim hrodźe. Přizjewjenja su z mailku na móžne.
Zwjazk Carity informuje
Worklecy. Jěwa-Marija Šnajdrowa, nawodnica dnjoweje hladarnje Hornjołužiskeho zwjazka Carity „Při Krabatowym puću“ we Worklecach, informuje wutoru, 25. měrca, w 19 hodź. w rumnosćach hladarnje wo hladanskich poskitkach zwjazka. Wšitcy zajimcy, wosebje ći, kotřiž doma přiwuznych hladaja, su wutrobnje přeprošeni. Na prašenja Jěwa-Marija Šnajdrowa tež telefonisce rady wotmołwja, a to pod čisłom 035796 942470.
Na předstajenje knihi a diskusiju
Budyšin. Z diskusiju wo knize esejow „Serbstwo, quo vadis?“ pokročuje Zwjazk serbskich wuměłcow (ZSW) swój rjad wuměłskich rozmołwow pod titulom „tracTare“ wutoru, 25. měrca, w 17 hodź. w Budyskej Smolerjec kniharni. Zběrka z přinoškami 19 awtorkow a awtorow z Hornjeje, srjedźneje a Delnjeje Łužicy je we wudawaćelstwje Marki Maćijoweje loni nazymu w LND wušła. Zawod do edicije poda Měrćin Wjenk. Na zarjadowanje su wšitcy zajimcy wutrobnje přeprošeni!
Kursaj čěšćiny w Čěskej
Budyšin. Štóž ma zajim, so na rěčnym kursu čěšćiny w Praze (17.07.–14.08.2025) abo w Čěskich Budějovicach (03.08.– 25.8.2025) wobdźělić, njech woteda hač do njedźele, 23. měrca, swoje přizjewjenske podłožki w Budyskim Rěčnym centrumje WITAJ abo njech sćele je z mejlku na: . Wotpowědny formular a dalše informacije su na internetnej stronje přistupne.
Na škot do Radworskeje Meje
Radwor. Škotowacy serbscy seniorojo su zaso wutrobnje na nowe koło w turněrje přeprošeni, kotrež wotměje so wutoru, 25. měrca, w 14 hodź. w Radworskej Meji. Kaž přeco su tež nowačcy wutrobnje witani. Dalše zarjadowanje serbskeho škota budźe 29. apryla w 14 hodź. w Ralbičanskim sportowym domje.
W muzeju jutrowne jejka debić
Młode wuměłstwo z Wojerec
Wojerecy. Wot pjatka, 21. měrca, prezentuja dwanatkarjo Wojerowskeho gymnazija Leóna Foucaulta wosebitu wustajeńcu pod titulom „Mjez rjejenjom a mjelčenjom“. Přehladka předstaja twórby młodych talentow we wuměłskich wobłukach molerstwo, grafika, měšana technika, plastika a objektowe wuměłstwo. Hižo wjele lět spěchuja zamołwići na šuli wuměłsce nadarjenych šulerjow. Wustajeńca w gymnaziju je za zjawnosć w šulskim času přistupna.
Alafia ensemble koncertuje
Budyšin. Na přichodnym zarjadowanju w rjedźe Budyskich komornych koncertow na žurli Budyskeho Serbskeho muzeja wustupi renoměrowany Alafia Ensemble a to sobotu, 22. měrca, w 19.30 hodź. Šěsć hudźbnikow z jara rozdźělnymi kulturnymi korjenjemi zwjazuje klasiska hudźbna tradicija, kotruž na inowatiwne wašnje interpretuja a kotruž regionalna hudźba wowliwuje. Zastupny lisćik w Budyskej turistiskej informaciji płaći 16, potuńšeny 13 eurow. Skazać móžeće jón tam pod telefoniskim čisłom 03591-42016. Zastup na wječoru předstajenja płaći 18 respektiwnje 15 eurow.
Na dźěćacy kružk a BBQ
Přednošuje wo hudźbje
Budyšin. Sekcija hudźba Maćicy Serbskeje přeprošuje na swoje přichodne zarjadowanje. Wone wotměje so srjedu, 19. měrca, w 19 hodź. w sydarni Budyskeho Serbskeho domu. Měrko Šołta přednošuje wo temje „Interpretaciske tradicije wuměłskeje serbskeje wokalneje hudźby“. Přednoškej přizamknje so rozmołwa.
Dźěło zarjada zeznać
Wojerecy. Składnostnje dnja strowotniskeho zarjada předstaji so strowotniski zarjad Budyskeho wokrjesa srjedu, 19. měrca, we Wojerowskim Łužiskim centeru zjawnosći pod hesłom „Koho stara strowota wobydlerjow Budyskeho wokrjesa?“. Wot 10 do 16 hodź. poskićeja zamołwići zajimcam wotměnjawy program. Dorosćeni móža na přikład swoje znajomosće prěnjeje pomocy wupruwować, swój šćěpjenski wupokaz kontrolować abo strowotny staw swojich woči přepruwować dać. Štóž 100 mililitrow čisteje wody sobu přinjese, móže jeje kwalitu zwěsćić dać. Tež za dźěći změja wšelake poskitki. Zarjadowanje je darmotne.
B 6 blisko Biskopic bórze zawru
