Z hłowneje zhromadźizny Domowiny w Chrósćicach tež jasne znamjo Serbskemu sejmej wusyłane

Chrósćicy (SN/JaW/at). Čas mjelčenja mjez třěšnym zwjazkom serbskich towarstwow a Serbskim sejmom zda so nachileć. Na 19. hłownej zhromadźiznje Domowiny sobotu w Chrósćicach je jeje předsyda Dawid Statnik k tomu jasne znamjo wusyłał. Ze słowami „na tajkim zakładźe je rozmołwa móžna“ reagowaše wón na diskusijny přinošk sejmarja Alexandera Pólka, kiž bě jako hósć k delegatam porěčał. Pólk wabješe za dialog mjez woběmaj, při čimž wujasni: „Serbski sejm připóznawa Domowinu jako zastupnistwo zajimow Serbow a serbskich towarstwow. Připóznawamy tež prócowanja serbskeju radow a dalšich gremijow wo polěpšenje situacije serbskeho ludu. Připóznawamy status Domowiny jako politisce připóznatu rěčnicu za serbski lud napřećo zwjazkowej republice a krajomaj Sakskej a Braniborskej.“ Hóstny rěčnik runje tak rjekny, wo čo sejmej dźe. Naš lud měł za sebje zamołwitosć přewzać. „Njewobhladujemy so tuž jako konkurenca, ale jako wudospołnjenje.“