Wot lěta 1964 wobstejace Wojerowske wuměłstwowe towarstwo zhladuje na podawkow połne lěto. Organizowali su jeho čłonojo lětsa něhdźe 70 zarjadowanjow – čitanja, přednoški, literarne přechodźowanja, wustajeńcy, njedźelne matineje a ekskursije.
Wojerecy (AK/SN). Wažne ćežišćo běše zhromadne dźěło ze šulemi, štož ma towarstwo za jara wažne. Za zakładne šule mějachu wodźenja po Zetkanišću Brigitty Reimann (1933–1973). Tam zbližichu sej šulerjo pochad, žiwjenje a tworjenje spisowaćelki, wo čimž swědča knihi, listy, fota a dokumenty. Helene Schmidt, Angela Potowski a Annett Pohle wodźa wuknjacych po rumnosćach. Po tym přeprošeja jich na přechodźowanje po měsće na slědach Brigitty Reimann. Šćežka pokazuje bytostne wotrězki jeje žiwjenja a skutkowanja we Wojerecach. „Chcemy z nowej centralnej wyšej šulu runje tak derje hromadźe dźěłać“, nadźija so dołholětny předsyda wuměłstwoweho towarstwa a jeho sobuzałožer Martin Schmidt. „Wšako bě Brigitte Reimann tež w tymle pod pomnikoškitom stejacym twarjenju ze swojich twórbow čitała.“