Choćebuz (SN/at). Dotalne štyri ertne jednanja Choćebuskeho zarjadniskeho sudnistwa nastupajo přirjadowanje komunow k serbskemu sydlenskemu rumej w Braniborskej běchu jedna tema posedźenja předsydstwa župy Delnja Łužica minjeny štwórtk w Choćebuzu. Zadźiwanosć wubudźi wuchadźišćo sudnistwa, kotrež přisłušnosć k sydlenskemu rumej wot dosć dopokazow na serbsku rěč a kulturu z doby poslednich 50 lět wotwisny čini. Runje powójnski čas běše charakterizowany wot spada delnjoserbskeje rěče. Z ćěkancami z prjedawšich němskich kónčin wuchodnje Nysy měli tež Delnjoserbja němcować, bě sej na přikład ewangelska cyrkej žadała. Kaž župan dr. Pětš Šurman našemu wječornikej praji, je župne předsydstwo dalšu kalamitu zwěsćiło, wo kotrejž bě hižo mjez serbskimi wopytowarjemi sudniskich jednanjow rěč: ABMnicy su w 1990tych lětach na wjesnych chronikach dźěłali. Serbske žórła pak w dalokej měrje čitali njejsu, dokelž rěč njewobknježachu. Tak su běłe blaki nastali.