Młodźinske dźěło Domowiny je wjace hač jenož woblubowane ludowe nałožki pěstować. To su sej čłonojo předsydstwa župy Delnja Łužica na wšelakich přikładach znowa wuwědomili.

Choćebuz (SN/at). Dźěło z młodźinu steješe w srjedźišću posedźenja předsydstwa župy Delnja Łužica wčera w Choćebuzu. Z namjetom běše so gremij hižo lětsa w januarje zaběrał. Tehdy běchu sej přezjedni, wo problemach diskusiju dale wjesć. Tomu wčera tak bě a młodźinski koordinator Tobias Unger rozprawješe wo dźěławosći młodźinskich skupin pod třěchu Domowiny w Delnjej Łužicy.

Přiběracy njedostatk je župny młodźinski koordinator nastupajo pěstowanje ludoweho nałožka jutrowneho wohenja zwěsćił, kaž župan dr. Pětš Šurman na naprašowanje našeho wječornika zdźěli. Na někotrych wsach za nałožk žane zjawne płoniny wjace njezměja. Na přikład su w Turjeju (Tauer) w prjedawšich lětach husto areale prodrustwa wužiwali. Te nětko zwjetša priwatnikam słušeja, Tobias Unger rozprawješe. Podobnje je połoženje w Pśiłuku (Preilack). „Bjez płoniny pak je přewšo ćežko tradiciju dale wjesć“, rjekny župan.