Herbert Stiller je jedyn ze sydom lawreatow, kotrymž je Domowina lětsa swoje čestne znamješko spožčiła. Lawdatorka běše Zala Cyžowa, městožupanka Kamjenčanskeje župy „Michał Hórnik“ kaž tež čłonka mytowanskeho wuběrka Domowiny. Wona wuzběhny, kak spěšnje je Herbert Stiller, w Baruće/Marce rodźeny a wot lěta 1981 w Chrósćicach bydlacy Němc, swójby dla serbsce nawuknył. Hižo w lěće 1983 přizamkny so wón z mandźelskej Hilžu Chróšćanskej serbskej lajskej dźiwadłowej skupinje. Hladajo na jeju prěnju rólu we wjeselohrě Jana Wornarja „Při cyganskej ławce“ serbski dźenik tehdy pisaše: „Wosebita chwalba słuša Stillerec mandźelskimaj, kotrajž jako nowačkaj na jewišću dobry wukon poskićeštaj. Herbert Stiller jako Němc zmištrowa wobšěrny serbski tekst z brawuru.“ Wužadowacu hrajnu rólu přewza wón tež w lěće 1988/89 w historiskej hrě Jana Wjele „Naš statok“ we Wotrowje, „do kotrejež běše so z ćěłom a dušu zanurił“ – Zala Cyžowa dźiwadźelske wukony lawreata wopisa.