Třěšny zwjazk so nad „přewšo dobrym wothłosom“ na koncerty wjeseli

Lejno (SN/mb). Poslednje lětuše posedźenje wjedźeše čłonow prezidija Domowiny najprjedy do Ptačec při saksko-braniborskej hranicy. Nawodnica tamnišeje šulskeje a domizniskeje stwy Martina Pečikowa pokaza hosćom nowy medialny poskitk: Na iniciatiwu rěčneje motiwatorki Marije Šołćic je wotnětka móžno, lokalne stawizny z pomocu techniki Bookii-pisaka serbsce dožiwjeć. Po tym witaše Blunjanski farar dr. Stefan Reichelt prezidij třěšneho zwjazka do wjesneje cyrkwje na serbsku nutrnosć.

Na wuradźowanju w „Swětłowni“ nad Lejnjanskim jězorom zaběraše so prezidij mjez druhim z wólbami do serbskeju radow a do krajneju sejmow w Sakskej a Braniborskej. Kaž z zdźělenki rěčnicy Domowiny Boženy Šimanec wuchadźa, su zdobom gremij plan župneje pawšale 2024 za prěnje tři kwartale schwalili. Prěnje klětuše posedźenje prezidija so 23. wulkeho róžka wotměje.