Budyšin (SN/mb). Dobra powěsć ze zarjada Załožby za serbski lud: Wšě wuměnjenja za pozitiwny rozsud załožboweje rady wo podlěšenju 26 časowje wobmjezowanych dźěłowych městnow su spjelnjene. To našemu wječornikej wčera zastupowaca direktorka załožby Michaela Mošowa wobkrući. Gremij so 13. awgusta schadźuje. W lěće 2021 je załožbowa rada nowe městna dźakowano zwyšenju statnych přiražkow wobzamknyła a loni hač do kónca 2024 podlěšiła. Na posedźenju w meji njeběše podlěšenje wo dalše lěto móžne, dokelž njebě přiražka Zwjazka za klětu hišće jasna.

Tomu, po rozsudźe zwjazkoweho knježerstwa zašły tydźeń, nětko tak je. Nimo toho su prawniske prašenja dorěčane a financowanje w ramiku budgeta załožby zaručene. Kajka budźe situacija 2026, je wotwisne wot ewaluacije tutych dźěłowych městnow hač do lětušeje nazymy a niwowa spěchowanja ze stron Zwjazka, Sakskeje a Braniborskeje za přichodne financne zrěčenje hač do 2030.