Po dwěmaj złotymaj w běhu štyrjoch dnjow docpě Němska wčera, srjedu, hnydom štyri medalje z drohometala. Miriam Butkereit je najwjetši wuspěch swojeje karjery swjećiła a slěbro w judo dobyła. 30lětna podleža we wahowej klasy hač do 70 kg hakle w finalu přećiwo dwukróćnej swětowej mišterce Barbarje Matić z Chorwatskeje.

Elena Lilik je sej tohorunja slěbornu medalju zawěsćiła. 25lětna olympiska debitantka podleži w kanadier-finalu, po jězbje bjez zmylka, jenož wurjadnej olympiskej dobyćerce Jessicy Fox z Awstralskeje. Lilik je sej tak prěnju medalju za Němski kanu-zwjazk (DKV) w Parisu zdobyła.

Isabel Gose je sebi bronzowu medalju přez 1 500 metrow w swobodnym stilu zawěsćiła. 22lětna docpě němski rekord 15:41,16 min. Dobyćerka discipliny bě Katie Ledecky z USA a druhe městno wudoby sej Francozowka Anastassija Kirpitschnikova. Za Ledecky je to hižo wosme złoto při olympiskich hrach. Lukas Märtens kwalifikowaše so mjeztym ze štwórtym najlěpšim časom za finale w płuwanju 200 metrow na chribjeće.