W Parisu zahaja dźensa 17. wudaće lětnich paralympiskich hrow. Paralympisku smólnicu su 24. awgusta w britiskim Stoke Mandeville, hdźež měješe hibanje swoje spočatki, zapalili a na wotewrjensku swjatočnosć po Doverskim přeliwje do Parisa dowjezli. Tež paralympiske stawizny maja dołhi puć za sobu. Po tym zo bě němski neurologa Sir Ludwig Guttmann 1948 Stoke Mandeville Games za wójnskich nawrótnikow w jězdnym stole do žiwjenja zwołał, přewjedu so sportowe wubědźowanja za zbrašenych. Prěnje oficialne paralympiske hry, kaž je dźensa znajemy, přewjedźechu pak so hakle dwanaće lět pozdźišo, 1960 w Romje.
Hry 2024 w Parisu startuja dźensa wječor a zakónča so 8. septembra. Zahajenska swjatočnosć wotměje so prěni króć zwonka stadiona. Wona startuje na sławnym Pariskim bulwarje Champs-Élysées a skónči so na runje tak sławnym Place de la Concorde wosrjedź francoskeje stolicy.
