W Parisu zahajichu wčera wječor paralympiske lětnje hry 2024 z wjesołej, ale tež hłubokomyslnej swjatočnosću pod hołym njebjom a při krasnym wjedrje. Wona zbudźi wulke předwjeselo na přichodne jědnaće dnjow wubědźowanja.

17 dnjow po hašenju olympiskeho wohenja, při zakónčenju olympiskich hrow w Parisu 11. awgusta, pali so woheń w francoskej stolicy znowa. Prezident Emmanuel Macron bě paralympiske hry w 22.37 hodźin oficialnje zahajił. Ceremonija bě so k zynkam pianista Chillyja Gonzalesa zahajiła. Předstaji so performance na wjacorych klawěrach kaž tež rejach a z wohnjostrojom. Krótki čas pozdźišo startowaše parada.

Přewodźane wot trenarjow, pomocnikow a medicinarjow poda so něhdźe 4 400 atletkow a atletow w pisanej, wjesołej a połdrahodźinskej paradźe wot pyšneho bulwara Champs-Élysées k Place de la Concorde. Na Place de la Concorde witaše jich potom 35 000 zahorjenych ludźi.