Prěnju medalju ma němske mustwo při paralympiskich hrach w Parisu hižo wěste. Blidotenisowa dwójka Stephanie Grebe a Juliane Wolf docpě štwórtk w startowej klasy WD14 finale a hraje dźensa wječor wo złoto. Po wuspěšnym štwórćfinalu dopołdnja bě jimaj hižo třeće městno wěste. Tež nawječor dobychu přećiwo dwójce Husic Dahlen/Tveiten z Norwegskeje.

Němskaj parablidotenisowaj europskaj mištraj Valentin Baus a Thomas Schmidberger žónsku dwójku napodobnještaj a zaručištaj sej z docpěćom ­połfinala bronzu. W horcym štwórćfinalu přesadźištaj so Düsseldorfčanaj snadnje přećiwo Chinjanomaj Fu Liu a Xiang Zhai a staj z tym znajmjeńša třećej. W połfinalu hraja Němcy nětko přećiwo šestej najlěpšej dwójce Turkowskeje Abdullahej Öztürkej a Nesimej Turanej. Ze zaćahom do koła poslednich štyrjoch mataj Němcaj medalju hižo wěstaj, dokelž so třeće městno njewuhraje. Wobaj přěhračkaj połfinala dóstanjetaj bronzu.