Max Nagl (Němska/KMP-Honda-Racing powered by Krettek) je sej z druhim městnom w druhim wubědźowanju w Jaworje dočasnje swój pjaty titul jako ADAC MX Masters champion zawěsćił. Při lěćnych temperaturach dožiwichu fanojo prěnje cyłkowne dobyće Corneliusa Töndela (Norwegska/Schmicker Racing), kotryž wobě wubědźowani njedźelu doby, před Naglom a Henryjom Jacobijom (Němska/KTM Sarholz Racing Team). Jacobi bě sobotu prěnje wubědźowanje dobył.

Po jara sylnej prěnjej połojcy sezony bě to jenož hišće prašenje časa, hdy Max Nagl swój titul zakituje. W Jaworje wotmołwi wón na prašenje z druhim městnom w druhim wubědźowanju a daše so jako stary a nowy ADAC MX Masters Champion 2024 swjećić. Ze swojim pjatym cyłkownym triumfom wuruna wón ličbu dobyćow z dotalnym rekordnym mištrom Dennisom Ullrichom (Němska /KTM Sarholz Racing Team). Nimo toho zapisa so wón, jako prěni jězdźer do lisćiny rekordow, kiž doby tři titule zasobu. To steji nětko w němskich motocrossowych stawiznach.