Přepytowanje wo „rěčnej krajinje“ Ralbic-Róžanta a Rakec předstajili

Budyšin (SN/mb). Wšitke puće a haski w kóždej wsy a wjesce gmejnow Rakecy a Ralbicy-Róžant je wón wotběhał, zo by „krajinu serbšćiny“ dokumentował. Z tym měni wón wšě pisomne serbske słowa a teksty w zjawnym rumje. Najbóle jimacy wokomik dožiwi młody wědomostnik Evan Bleakly w busu, hdyž su w Ralbicach dźěći do busa zalězli, kotrež su mjez sobu serbowali. Tule prěni raz pytny, zo je tuta rěč woprawdźe žiwa. To powědaše wčera wječor na žurli Serbskeho domu w Budyšinje w swojim přednošku „Hornjoserbšćina w rěčnej krajinje: Přirunowanje mjez gmejnomaj Ralbicy-Róžant a Rakecy“ na Maćičnej akademiji. Na zjawnym zarjadowanju, kotrež předsydka Maćicy Serbskeje dr. Anja Pohončowa moderěrowaše, so tež mnozy zajimcy online wobdźělichu.