VV Žitawa 09 –

Viktoria Worklecy 0:3

(19:25, 20:25, 19:25)

Po wuspěšnym domjacym hrajnym dnju móžachu Worklečanscy wolejbulisća najprjedy raz wodychnyć a so přez skok do srjedźneho pola sakskeje klasy wjeselić. Ale tute městno ma so nětko tež zakitować. Wosebje wažne su při tym hry přećiwo direktnym susodam w tabulce. Jedyn tajki je VV Žitawa, ke kotremuž dojědźechu sej Worklečenjo zašły kónc tydźenja.

Žitawčenjo dyrbja w tutej sezonje personelne změny wurunać a su tuchwilu hišće při tym, mustwowu zhromadnosć namakać. Tole pokaza so hižo w prěnjej hrě dnja přećiwo Póstej Drježdźany, kotraž skónči so jasnje 0:3.

Hosćo, kotřiž z třomi dorostowymi hrajerjemi nastupichu, pokazachu hnydom hrajersku sylnosć a mějachu přeco někak dwaj dypkaj předskoka. Zo předskok jasniši njebě, zaležeše zaso raz na tójšto njekoncentrowanych nadaćach Viktorianorow. Staroznata to słabosć. W nadběhu pak běchu jasnje sylniši. Tak poradźi so tež wot 13:14 na 16:21 zwyšić. Zbytne dypki prěnjeje sadźby běchu formalna wěc.