Na zwjazkowym předsydstwje wčera w Budyšinje je Rěčny centrum Witaj (RCW) w nošerstwje třěšneho zwjazka nowe myto za młodych ludźi předstajił, kotřiž su na wysokim niwowje delnjoserbšćinu nawuknyli.

Budyšin (SN/mb). Štóž jako 18 do 30lětny z wosebitym angažementom delnjoserbšćinu wuknje a ju tak nawuknje, zo pruwowanje po europskim referencnym ramiku za rěče na niwowje C1 z „derje“ abo „jara derje“ wobsteji, móže so wo připóznaće „młoda ekscelenca“ pola RCW požadać. Maksimalnje dwěmaj wosobomaj wob lěto chce zarjadnišćo tajke wu­znamjenjenje spožčić a kóždemu 5 000 eurow dać. Wo tym rozprawješe Bernd Melcher, šef RCW w Delnjej Łužicy. Nawodnica RCW Beata Brězanowa doda, zo je to nimale maćernorěčny niwow a zo ludźi z tutej kompetencu trjebamy. Woni móhli w přichodźe na přikład słowniki wudźěłać a rěč dale wuwiwać.