Sokoł Ralbicy/Hórki –

SJ Großnaundorf 0:0

Zestawa domjacych: Schöne – Mikławšk, Rawš, Wałda, Mjechela, Gloxyn, Šewc, Bejmak, Rachela, Korjeńk, Woko (50. Šiman­)

Po bjezwrotowym remisu zašły kónc tydźenja dźěchu Ralbičenjo njedźelu ze samsnym wuslědkom z hrajnišća. Duele přećiwo mustwu z Großnaundorfa běchu w zańdźenosći stajnje snadne a tež tónraz sej wobaj cyłkaj ničo njedarištej.

W prěnim połčasu běchu hosćo lěpši. Zady stejachu jara wěsće a z dołhimi bulemi spytachu spěšnych nadběhowarjow pósłać. To so tón abo tamny raz poradźi, tola Willi Schöne we wrotach Sokoła měješe znowa wulkotny dźeń a wšitke horce nadběhi znješkódni. Tón abo tamny raz měješe Schöne tež zbožo, jako kulowata koža wrota snadnje misny. Ralbičenjo móžachu drje ćělnje kaž tež hrajersce derje sobu dźeržeć, tola strašne nadběhi hišće žane njepokazachu.