HZ Wóslink/Skaskow/Kulow II – SJ Njebjelčicy 2:1 (2:0)

Zestawa hosći: D. Weclich – Schulze, Reineke A. (76. Hahn), Hanuza, F. Hrjehor (57. R. Weclich), Rudolf, Čornak, Lehmann, F. Domš, Plaettner, O. Domš

Hnydom po zahwizdanju hosćo hru kontrolowachu. Přeco zaso předrěchu so strašnje k wrotam, zwrěšćichu pak při zakónčenju nadběhow. Hosćićeljo wobmjezowachu so na to, dołhe bule na swojich spěšnych ofensiwnych ludźi hrać. Běchu pak jenož zrědka strašni za Njebjelčanow.

Po 14 mjeńšinach zestupnik přiwšěm nawjedowaše. Po róžku stejachu škitarjo hosći přešpatnje. Pjaca tutu šansu wuži a suny bul do saka 1:0 (14.). SJ Njebjelčicy wustupowaše dale dominantnje a bul jenož zrědka woteda, tola wunoška z toho njeměješe. Bul nochcyše prosće přez wrotowu liniju. Za to hosćićeljo hišće raz juskachu. Poprawom njestrašny dołhi bul Plaettner wotběža. Bohužel pak komunikacija z wrotarjom Weclichom njefungowaše. Po hesle „wzmi ty – ja mam“ přewostajichu bul Wóslinčanskemu nadběhowarjej, kotryž docpě nawjedowanje 2:0 (40.).