Berlin/Lipsk (SN/mb). Sören Pellmann z Lipska je nimo Heidi Reichinnek ze Saksko-Anhaltskeje nowy předsyda skupiny Lěwicy w zwjazkowym sejmje. Wonaj staj so w jara wuskim wothłosowanju přećiwo faworitomaj předsydow strony přesadźiłoj. Pellmann je hišće loni prajił, zo je Sahra Wagenknecht za Lěwicu njeparujomna, a předsydstwo Lěwicy wobchadźenja z popularnej politikarku dla wótře kritizował. Po wotchadźe horstki zapósłancow kołowokoło Wagenknecht je Lěwica swój status jako frakcija přisadźiła. Pellmann bě 2021 ze swojim direktnym mandatom frakciju wuchował, byrnjež Lěwica jenož 4,9 procentow docpěła.

Kijew (dpa/SN). Ukrainski prezident Wolodymyr Zelenskyj je po wopyće na fronće wojerske połoženje w potrjechenej kónčinje „jara wobćežne“ mjenował. Problemy maja Ukrainjenjo na wotrězkach fronty, hdźež Rusojo najwjetše rezerwy koncentruja, rjekny Zelenskyj w swojim wšědnym widejowym poselstwje. „Woni znjewužiwaja pobrachowacu pomoc na dobro Ukrainy.“ Zelenskyj wobžarowaše pobrachowacu municiju za artileriju, lětadła wotwobarace systemy a daloko sahace rakety. Kijew prócuje so doraznje wo dalšu wojersku pomoc zapadnych krajow, Zelenskyj swojim krajanam wobkrući. Hakle kónc tydźenja běchu so ukrainscy wojacy z města Awdijiwka wróćo sćahnyć dyrbjeli.

W Němskej chcedźa frakcije knježerstwoweje koalicije zwjazkowe knježerstwo namołwjeć, Ukrainje dalše brónje přewostajić. W tym zwisku rěča indirektnje wo němskich raketach typa Taurus, kotrež hač do 500 kilometrow daloko ­leća a kotrež móhli objekty daloko za ruskimi wojerskimi linijemi nadběhować.

Němska wójnska łódź „Hessen“ hotuje so na misiju w Čerwjenym morju

Souda (dpa/SN). Krótko do zahajenja strašneho zasadźenja němskeje fregaty „Hessen“ w Čerwjenym morju je zakitowanski minister Boris Pistorius (SPD) dźensa něhdźe 240 wojakow na łódźi wopytał. Minister je wčera wječor na kupu Kreta dolećał, hdźež je 143 metrow dołha wójnska łódź po puću z Wilhelmshavena do krizoweje kónčiny pozastała. Dyrbjał-li zwjazkowy sejm misiji kaž planowane pjatk přihłosować, chce so „Hessen“ hnydom po tym po Suezowym kanalu do Čerwjeneho morja podać.

Wonkowni ministrojo čłonskich statow EU běchu hižo wčera zelenu swěcu za operaciju „Aspides“ dali. Je to dotal najstrašniše zasadźenje mariny w stawiznach zwjazkoweje wobory. Prěnjotny nadawk misije je škit wikowanskich łódźow před nadpadami militantneje islamistiskeje milicy Huthi z Jemena. Milica chce sej z nadpadami na ciwilne łódźe kónc israelskich nadpadow na Gazaske pasmo wunuzować. Nastork wójny w Gazskim pasmje bě masaker islamistiskeje Hamas a druhich palestinskich skupin 7. oktobra 2023 w Israelu.

Wustróžane reakcije na smjerć kritikarja Krjemla Alekseja Nawalnyja w jednym z ruskich chłostanskich lěhwow su dospołnje woprawnjene. Prezident Wladimir Putin opoziciju a wšěch, kotřiž njejsu jemu derje zmysleni, bjez hnady jako agentow a teroristow přesćěhuje. Kritiske medije su dawno womjelkli. Lisćina zasudźenych abo na mysteriozne wašnje zemrětych opozicionelnych je prosće předołha, hač zo by hišće něchtó do připada wěrić móhł.

Rozhorjenje zapada po smjerći Nawalneho je pak jenož potom wěrjomne, hdyž we Washingtonje, Brüsselu, Berlinje a druhdźe ze samsnej měru měrja. Tutón tydźeń rozsudźi sudnistwo w Londonje wo dóńće Juliana Assangea, kiž je wójnske złóstnistwa USA wotkrył. Za to chcedźa jeho w USA 175 lět do jastwa tyknyć a takrjec žiweho pohrjebać. Zwjazkowe knježerstwo měło sej wot USA žadać, zo Assangea dlěje njewobskorža. Hewak njewostanje žałosćenje Nawalnyja dla ničo druhe hač falšne. Marko Wjeńka