Berlin (dpa/SN). Sakski ministerski pre­zident Michael Kretschmer (CDU) nowe zwjazkowe knježerstwo namołwja, zrěčnje nastupajo skónčenje zmilinjenja brunicy dodźeržeć. „Mamy wosebity zajim w srjedźnej Němskej na tym, zo ludźo dźěłowe městna njezhubja a zo njedóstanjemy šok w regionje“, rjekny wón wčera w sće­laku MDR. Nimo toho trjeba Němska stabilne zastaranje z milinu. Kretschmer po­ka­za hladajo na planowany kónc brunicy 2038 na wobstejace zakonje a zrěčenja. „Te njemóžemy nětko spěšnje wupowědźić. Komu móža ludźo scyła hišće něšto wěrić? Trjebamy lěta hač do 2038, zo móhli infrastrukturu wutwarić a dźěłowe městna zasydlić.“ Kretschmer ma za njemóžne, jadrowu energiju a zmilinjenje brunicy skónčić a runočasnje Němsku jako wu­bědźowanja kmany kraj zachować. Wón so nadźija, zo móže so nowy zwjazkowy kancler Olaf Scholz w tymle prašenju přesadźić „zo njeby SPD swoje přilubjenja raniła a zo njeby tež FDP přilubjenja raniła“. SPD, Zeleni a FDP chcedźa kónc brunicy „w najlěpšim padźe“ hižo 2030.

Braniborska chce zhromadne dźěło ze Zwjazkom polěpšić

Berlin/Frankfurt n. W. (dpa/SN). Wo planowanym spěšnišim rozdźělenju ludźi, kotřiž na njedowolene wašnje z Běłoruskeje přez Pólsku do Němskeje přińdu, chcedźa prawdźepodobnje w prěnjej połojcy nowembra rozsudźić. Kaž rěčnik zwjazkoweje policije zdźěli, tole tuchwilu přihotuja. W tym zwisku chcedźa ka­pacity zaměstnjenja rozšěrić. Planowane je nimo toho, za prěnjotne zaměstnjenje tepjene rumnosće přihotowane měć. Zastojnicy maja ze zwjazkowym zarjadom za migraciju a ćěkancy hromadźe dźěłać, kiž so wo rozdźělenje ćěkancow na druhe zwjazkowe kraja stara. Tuchwilu wšitkich ludźi, kotřiž z Běłoruskeje do Braniborskeje přińdu najprjedy raz w domje za prěnjotne zaměstnjenje w Eisehüttenstadtće registruja. Při tym dźe wo wěstotne přepruwowanje, wo koronatest a wo zastaranje ludźi. Hakle pozdźišo ćěkancow na druhe zwjazkowe kraje rozdźě­leja.

Islam słuša k Němskej – tute słowa by­wšeho němskeho zwjazkoweho prezidenta Christiana Wulffa njejsu 2015 jenož šěršu­ diskusiju zbudźili, ale tež wotmołwu te­hdy­šeho sakskeho ministerskeho prezidenta Stanisława Tilicha, zo islam k Sak­skej njesłuša. Za nabožinami so njepraša projekt „Kak klinči domizna?“, ale hladajo na rěče, kotrež su w Sakskej słyšeć, zabjeru producenća razne politiske stejišćo. Chcedźa mjez druhim „wjeleworštowu rěčnu kulturu Sakskeje“ pokazać. „Čehodla wěnujemy so wulkemu słowu ,domizna‘? No­chcemy zapřijeće tym tamnym přewostajić. A k sakskej domiznje słušeja tež migranća“, rjekny z Drježdźan pochadźacy a w Berlinje bydlacy spěwar Felix Räuber wčera wječor na mjezyprezentaciji w sakskej stolicy. Tam su wurězki z třoch epizodow předstajili, a k tomu je Räuber tři spěwy zanjesł – jedyn jendźelsko-, jedyn němsko- a jedyn serbskorěčny. Hladajo na dalše epizody so nadźijomnje hišće někotre rěče přidruža. Cordula Ratajczakowa

Hižo poł hodźiny po kradnjenju awta je policija w sewjerorynsko-westfalskim Bestwi­gu wobsedźerjej wóz zaso wróćić móhła. Zastojnicy wuhladachu awto na zwjazkowej dróze 480, po tym zo bě jich centrala wo kradnjenym awće informowała. Šofer spyta ćeknyć, dyrbješe pak po krót­kej honjeńcy bjezwuhladnosć dowi­dźeć. 58lětneho zajachu. Wón dyrbi so padustwa, smalenja a jězdźenja bjez jězbneje dowolnosće dla zamołwić.

„Frizerskeho termina dla“ je šoferka wosobo­weho awta městno njezboža w Regensburgu wopušćiła, bjez toho zo by so wo zranjenu wužiwarku rolera stara­ła. 31lětna bě při zaparkowanju za njej jěducy roler přewidźała a by 21lětnu žonu bjezmała přejěła, kotraž bě při borzdźenju padnyła. Na to 31lětna z přispomnjenjom, zo dyrbi k frizerej, wot­jědźe. Wona dyrbi nětko ze skóržbu ćeknjenja po njezbožu dla ličić.