Dalše wohenje
Athen/Istanbul (dpa/SN). Lěsne wohenje w Grjekskej a Turkowskej dale cychnuja. Minjenu nóc su sej płomjenja swój puć přez zeschnyte lěsy a kerčiny rubali. Dźensa rano je sylny wětřik połoženje dale přiwótřił.
Grjekski ministerski prezident Kyriakos Mitsotakis nastaja wobydlerjow na ćežke dny, dokelž so mjeztym tež na kromje stolicy Athena pali. Tam su hižo prěnje bydlenske štwórće ewakuowali. Tež w Turkowskej wohnjowi wobornicy dale přećiwo płomjenjam wojuja. Na wšě 13 wulkich wohenjow nimaja tam přeco hišće pod kontrolu, kaž medije rozprawjeja.
To a tamne (06.08.21)
Z internetnym přesadźowanjom swojeje baseballoweje čapki je pomocnik po zapławjenjach 48lětny Markus Wipperfürth wulki wothłós zbudźił. Mjeztym skića jemu wjace hač 133 000 eurow na platformje eBay za dotrjebanu staru čapku. Kaž rěčnik eBayja wobkrući, je poskitk seriozny. Pjenjezy chcedźa woporam wulkeje wody přewostajić. Ratar z kónčiny blisko Kölna hižo tydźenje w Porynsko-Pfalcy pomha a wo tym na Facebooku 400 000 ludźom rozprawja.
Njestrašna skulptura w formje ručneje granaty w kófrje je na lětanišću w Frankfurće nad Mohannom zasadźenje policije zawiniła. Lětadło njesmědźeše wotlećeć. Sobudźěłaćer wačokarnje bě spodźiwny předmjet pod roentgenowym nastrojom wuhladał. Fachowcy hakle zwěsćichu, zo jedna so wo wuměłsku skulpturu a zo z njeje žadyn strach njewuchadźa.
Darmotne testy bórze nimo?
Berlin (dpa/SN). Darmotne testy na koronawirus su zwjazkowe knježerstwo dotal 3,7 miliardow eurow płaćili, kaž z wotmołwy zwjazkoweho ministerstwa za strowotnistwo na naprašowanje nowinarjow wuchadźa. Mjeztym wo tym diskutuja, hač njeměli sej wot oktobra pjenjezy za testy žadać, dokelž móža potom wšitcy přećiwo wirusej šćěpjeni być. Darmotne wostali bychu potom jenož hišće testy za dźěći a za tych, kotrychž njemóža strowotniskich přičin dla šćěpić.
Namjet Spahna wotpokazuja
Berlin (dpa/SN). Zwjazkowy minister za strowotnistwo Jens Spahn (CDU) žněje ze swojim namjetom, nješćěpjenych z dźělow zjawneho žiwjenja wuzamknyć, kritiku z rjadow koaliciskeho partnera SPD. Pozicija Spahna njeje měnjenje zwjazkoweho knježerstwa, rjekny justicna ministerka Christine Lambrecht nowinarjam. Bremenski wyši měšćanosta Andreas Bovenschulte ma namjet Spahna za „njezakonski“. Braniborski ministerski prezident Dietmar Woidke je za to, negatiwnje testowanym dale wobdźělenje na zarjadowanjach zmóžnić.
Pjenjezy za Libanon přewostajili
Drježdźanska coologiska zahroda je dźensa 900 000 eurow ...
Sakska šćěpjenske dozy wotskaza
Drježdźany (dpa/SN). Sakska je snadneho naprašowanja šćěpiwow dla dźesaćitysacy dozow pola Zwjazka wotskazała. Za přichodny tydźeń su hižo 58 500 dozow šćěpiwa Biontech storněrowali, zdźěli rěčnica sakskeho strowotniskeho ministerstwa předwčerawšim na naprašowanje. Tež za dwaj tydźenjej njeje žana skazanka planowana.
Składźišća su tučasnje hišće pjelnjene, ludźo pak su skerje zdźeržliwi. Hižo za tónle tydźeń je ministerstwo transport šćěpiwow zastajiło. Za Saksku dźě bě 58 500 dozow Biontech a 78 000 dozow předewzaća Moderna planowane. Hižo 7. julija je strowotniske ministerstwo swobodneho stata skazanki šćěpiwa Astrazeneca wotskazało.
Hižo tydźenje so šćěpjenska kampanja w Sakskej dliji. Tohodla je ministerski prezident Michael Kretschmer (CDU) zhromadnje z wjacorymi organizacijemi za škitne šćěpjenje wabił. W Sakskej je tučasnje 47,7 procentow wobydlerjow dwójce šćěpjenych, po cyłej Němskej leži kwota pola 52,6 procentow.
Strony so na wólbny bój hotuja
Z programom wabja SPD kaž tež CDU a CSU wo hłosy wolerjow
Berlin (dpa/SN). W kampani za wólby zwjazkoweho sejma spušćeja so socialni demokraća na přiběracu popularnosć swojeho kanclerskeho kandidata Olafa Scholza. Hłowne hesło wabjenja wo hłosy wolerjow je „Scholz so gratu přima“, rjekny wčera generalny sekretar SPD Lars Klingbeil jako předstaji kampanju w Berlinje. Scholz ma najwjetšu kompetencu a je pokazał, zo móže plany tež zwoprawdźić, zwurazni Klingbeil hladajo na woblubowanosć zwjazkoweho financneho ministra a wicekanclera.
SPD zasadźa we wólbnym boju čornoběłe wosobowe a temowe plakaty. Centralna barba je čerwjena. Socialdemokraća maja wólbnobojowy etat 15 milionow eurow k dispoziciji. SPD je ze 405 000 čłonami dale najwjetša strona Němskeje, kotraž steji před wulkimi wužadanjemi: Tak dyrbi kraj koronapandemiju přewinyć. Nimo toho dźe wo transformaciju hospodarstwa a towaršnosće do směra na klimowu neutralitu.
Zwyša popłatk
To a tamne (05.08.21)
Znjewužiwanja wohnjoweje wobory dla su 31lětneho w Augsburgu k pokuće 6 000 eurow zasudźili. Muž bě wohnjowu woboru z nuzowym čisłom k swojemu bydlenju wołał, po tym zo bě so sam wuzamknył. Wobornikam bě napowědał, zo njewě, hač hišće něšto na kuchinskich kachlach steji, byrnjež wědźał, zo tomu tak njeje.
Našijneho rjećazka dla su wčera radnicu durinskeho Steinbacha-Hallenberga ewakuowali. Debjenka bě w pakćiku, kotryž bě přistajena sobu na dźěło přinjesła. Při tym jej napadny, zo bě pakćik wot jej njeznateje firmy. Dokelž tukachu na škódnu maćiznu, wołachu fachowcow wohnjoweje wobory a krajneho kriminalneho zarjada. Skónčnje so wukopa, zo jedna so wo našijny rjećazk, kiž bě žona spočatk lěta internetnje skazała – a mjeztym na to zabyła.
Timanowskaja do Awstriskeje
Wien (dpa/SN). Běłoruska sportowča-běharka Kristina Timanowskaja je po puću do Wiena, kaž awstriske wonkowne ministerstwo wobkruća. Po informacijach medijow je 24lětna rano w Tokiju wotlećała. W běhu popołdnja wočakowachu ju we Wienje. Poprawom běchu wočakowali, zo Timanowskaja do Pólskeje poleći. Waršawa bě jej humanitarny wizum spožčiła. Mjezynarodny olympiski komitej mjeztym móžne pospytane zawlečenje młodeje žony přepytuje.
Namołwja kolegu wotstupić
Washington (dpa/SN). Po nadrobnych wumjetowanjach splažneho wobćežowanja wjacorych žonow dla je prezident USA Joe Biden za to, zo měł guwerner zwjazkoweho stata New York Andrew Cuomo swoje zastojnstwo złožić. „Myslu sej, zo dyrbjał wón wotstupić“, rjekny Biden wčera w Běłym domje wo swojim stronskim koleze. Do toho je generalna statna rěčnica Letitia James wuslědk přepytowanja předpołožiła, po kotrymž bě Cuomo wjacore žony wobćežował.
Přemało datow za Sputnik
