Sakski ministerski prezident Michael Kretschmer (CDU, naprawo) je ...
Merkel: Ludźi šćěpić
Berlin (dpa/SN). Zwjazkowa kanclerka Angela Merkel(CDU) je hladajo na zaso přiběracu ličbu natyknjenjow z koronawirusom ludźi na dalši ćežki čas nastajiła. W Němskej knježi „jasna dynamika, kotraž dawa přičinu so starosćić“, rjekny zwjazkowa kanclerka wčera na swojej prawdźepodobnje poslednjej lětnjej nowinarskej konferency w Berlinje. Hladajo na přiběrace ličby infekcijow wona namołwješe, prócowanja nastupajo šćěpjenje pře koronu zesylnić. „Čim wjace ludźi je šćěpjenych, ćim swobodniši budźemy.“ Dalše temy poslednjeje nowinarskeje konferency z Berlinskimi žurnalistami běchu katastrofa zapławjenja w dźělach Němskeje, škit klimy a dojednanje nastupajo płunowód Nord Stream 2.
K wólbam zwjazkoweho sejma w septembru Angela Merkel wjace njenastupi. Wona chce so z politiki wróćo sćahnyć.
Schwesig šwika Baerbock
Pytaja kaž detektiwy za wirusom
Podstupim (dpa/SN). Pytać za pućom přenjesenja afriskeje swinjaceje mrětwy do wobstatka domjacych swini je po informacijach Friedricha Löffleroweho instituta čas rubjace detektiwne dźěło. „Fachowcy dyrbja do kóždeho kućika hladać“, praji rěčnica mjenowaneho zarjada Elke Reinking wčera nowinarjam. Po tym zo běchu spočatnje jenož fachowcy instituta při dźěle, su nětko tež weterinarojo wobdźěleni. „Woni maja něhdźe 60 stron wopřijacy katalog prašenjow wotdźěłać“, wona rjekny. Je to standardny katalog, kotryž tež druhe zwěrjeće mrětwy nastupajo kaž pola ptačeje gripy nałožuja.
Dźens tydźenja běchu prěnje pady mrětwy pola domjacych swini w Braniborskej zwěsćili. Nětko přepytuja fachowcy wobstejnosće w chlěwach. Nimo toho pruwuja, štó měješe tam přistup a štó bě dodawar picy. Nic naposledk chcedźa zwěsćić, hač je wirus samsny, kaž běchu jón pola zahinjenych dźiwich swini namakali. Wšitke informacije w kónčnej rozprawje přepodadźa potom zamołwitym na krajnej runinje.
Myto absolwentce spožčili
Berlin/Frankfurt n. W. (RD/SN). Za jeje dźěło wo Nowej synagoze w Poznanju su Gabi Mans, absolwentku kulturnowědomostneje fakulty Europskeje uniwersity Viadrina w Frankfurće nad Wódru, w Berlinje z wědomostnym spěchowanskim mytom wulkopósłanca Republiki Pólskeje 2020 počesćili. Dorostowa wědomostnica dósta z tysac eurami dotěrowane hłowne myto w kategoriji masterske dźěło za swój wudźěłk z titulom „Fragmenty, łamki a kontinuita města wopominanja – twarjenje Noweje synagogi w Poznanju“.
Wot lěta 2008 spožča wulkopósłanstwo Pólskeje spěchowanske myto za wusahowace masterske dźěła z wobłuka duchownych a socialnych wědomosćow k pólskim stawiznam a kulturje kaž tež k němsko-pólskim poćaham. Myto słuži spěchowanju wědomostneho dorosta a ma zaměr, studowacych a promowowacych pohnuć so z němsko-pólskimi temami rozestajeć. We wobłuku zjawneho spožčenja myta wuzběhuja intensiwny wědomostny angažement młodych ludźi. Koronapandemije dla běchu spožčenje lońšeho myta přestorčili.
To a tamne (23.07.21)
Na wšě 20 000 wobdźělnikow wočakuja jutře w Berlinje na tradicionalnej paradźe homo-, bi- a transseksuelnych „Christopher Street Day“, po tym zo móžachu lońšu paradu jenož internetnje přewjesć. Demonstranća dyrbja koronakrizy dla škitny nahubnik wužiwać. Hłownej žadani lětsa stej zjednorić mjena za transseksuelne wosoby a zběhnyć zakaz za potrjechene skupiny, krej darić směć.
Z wodomjetakami a sylzopłunom je grjekska policija demonstraciju přećiwnikow šćěpjenja w Athenje rozpušćiła. Něhdźe 3 000 demonstrantow bě přećiwo naprawam knježerstwa protestowało, kotrež ćišć na nješćěpjenych zesylnja. Tak je mjeztym zakonsce postajene, zo smědźa do nutřkownych rumnosćow hosćencow a kulturnišćow jenož hišće šćěpjeni zastupić. Sobudźěłaćerjo strowotnistwa dyrbja šćěpjeni być.
Dalše zliwki hroža
Offenbach (dpa/SN). W Porynsko-Pfalcy a Posaarskej dyrbja so ludźo kónc tydźenja znowa na zliwki a hrimanja nastajić. Přiwšěm njemóža meteorologojo Němskeje wjedroweje słužby w Offenbachu dotal hišće rjec, hač dóńdźe znowa k njewjedram. Prěnje spadki wočakuja sobotu na zapadźe. Njedźelu a póndźelu drje budźe wša Němska potrjechena. Minjeny tydźeń běchu sej njewjedra a zapławjenja 172 smjertnych woporow žadali.
Bydlenska politika tema
Drježdźany (dpa/SN). Sakski krajny sejm je so dźensa z bydlenskej politiku rozestajał. Debata na próstwu frakcije Lěwicy steješe pod hesłom „Zapłaćomne podruže w městach a wsach město wupředanje – podruže wobmjezować, socialnišo twarić, bydlenja w komunalnych rukach zachować“. Dalše temy běchu digitalizacija a zapućowanje ćěkancow. Minister za wobswět, energiju, škit klimy a ratarstwo Wolfram Günther (Zeleni) dyrbješe na prašenja zapósłancow wotmołwjeć.
Ludwig a Hausding z chorhoju
W Norwegskej su dźensa wopory teroroweju nadpadow w Oslu a na kupje ...
Söder: Kónc brunicy hižo do lěta 2038
Mnichow/Drježdźany (dpa/SN). Bayerski ministerski prezident Markus Söder chce wo wobzamknjenym skónčenju zmilinjenja brunicy w Němskej po wólbach zwjazkoweho sejma znowa wuradźować. Pruwować so měło, „hač njeje kónc brunicy hišće spěšnišo móžny“, rjekny předsyda CSU w swojej knježerstwowej deklaraciji wčera w Bayerskim krajnym sejmje. „Mam lěto 2038 tež na tutym městnje za njenaročne.“ Tak chcył so wón za to zasadźeć, kónc brunicy hižo w lěće 2030 zmóžnić.
FDP wuprajenja premiera kritizuje. „Söder zaso raz bjez zdaća wokoło błudźi a zaměnja populistisku symbolowu politiku z woprawdźitym škitom klimy“, praji klimopolitiski rěčnik frakcije w zwjazkowym sejmje Lukas Köhler. Wot Södera žadane nowe jednanja njebychu k škitej klimy přinošowali, ale bychu jeničce wobsedźerjam milinarnjow dalše miliardy wotškódnjenja wunjesli, štož bychu dawkipłaćerjo financować dyrbjeli.
Merkel Putinej kompromis rozkładła
Berlin (dpa/SN). Zwjazkowa kanclerka Angela Merkel (CDU) je wčera po informacijach knježerstwa z ruskim prezidentom Wladimirom Putinom telefonowała. Jedna z temow bě rusko-němski płunowód Nord Stream 2. Kanclerka rozłoži Putinej w tym zwisku kompromis, kotryž běchu USA a Němska do toho wujednali. W prěnjej reakciji chwaleše rěčnik Krjemla „konsekwentne zasadźenje němskeje strony“ při zwoprawdźenju „ryzy hospodarskeho projekta“, kiž polěkuje energijowej wěstoće Němskeje, kaž rěkaše.
Němska a USA běchu so po lěta trajacej zwadźe na kompromis dojednali. Płunowód ma so dotwarić, bjez toho zo USA dalše sankcije wukazaja. Z nim dóstawa Němska zemski płun z Ruskeje. Z nowej pipelinu wobeńdu Ukrainu, kotraž je na srědki z transita płuna pokazana. Chłostanja přećiwo Ruskej měli so hakle postajić, hdyž wona płun jako srědk politiskeho ćišća nałožuje. Wonkowny minister Heiko Maas (SPD) reaguje wolóženy na dojednanje a mjenuje je „konstruktiwne rozrisanje“.
