Bórze dwójka na čole sakskeje krajneje SPD ?
Lipsk (dpa/SN). Sakska SPD móhła hižo bórze wot dwójki nawjedowana być. To su delegaća strony předwčerawšim, njedźelu, na swojim krajnym zjězdźe w Lipsku wobzamknyli a wustawki strony wotpowědnje změnili. Po nowym statuće dyrbjała w tajkim dwójnym nawodnistwje znajmjeńša jedna žona zastupjena być. Tež muski předsyda abo žona na čole staj móžnaj. Ryzy muska dwójka pak je wuzamknjena.
W swojej narěči namołwješe rozžohnowacy so krajny předsyda Martin Dulig čłonow strony do energiskeho wólbneho boja w zbywacych tydźenjach do wólbow zwjazkoweho sejma, najebać špatne wuslědki naprašowanjow. Wón napominaše, zo njesměła so strona nětko ze sobu zaběrać, po tym zo bě wón njedawno připowědźił, zo njebudźe na wólbnym zjězdźe sakskeje SPD w oktobru hižo jako předsyda kandidować.
Čłonojo dyrbjeli so nětko „z połnej paru“ do wólbneho boja podać. Wudani so „dale wo kóždy hłós wojować“, Dulig podšmórny. Hladajo na wuslědki naprašowanja móhło sej 30 procentow ludźi w Němskej předstajić, zo wola SPD.
Statne srědki komunam pomhali
Gütersloh/Drježdźany (dpa/SN). Koronakriza je sakske komuny ćežko trjechiła, ale statne pomocy su najhóršemu zadźěwali. Kaž z najnowšeje komunalneje financneje rozprawy Bertelsmannoweje załožby wuchadźa, su komuny pola dawkow a popłatkow wjace hač 600 milionow eurow přisadźili. Na kóncu pak móžachu etat ze snadnym dobytkom wotzamknyć, dźakowano wobšěrnej pomocy Zwjazka a krajow. Za komuny bě to mjeztym wosme lěto za sobu z dobytkom.
Po rozprawje Bertelsmannoweje załožby je so koronakriza wosebje na sensibelny přemysłowy dawk wuskutkowała. Po cyłej Němskej su komuny nimale dźewjeć miliardow eurow zhubili, w Sakskej wjace hač 300 milionow.
Zo bychu straty wurunali, su sej Zwjazk a zwjazkowe kraje kóšty dźělili. Dokelž njebě kriza na kóncu tak wulka kaž wočakowana, su sakske komuny samo dźesać milionow eurow wjace dóstali hač lěta 2019. Nimo toho je Zwjazk swój podźěl za kóšty Hartza IV powjetšił, štož komunam tohorunja pjenježnje pomha.
Šćěpjenym swobodu wróćić
Šef zwjazka kasowych lěkarjow za kónc wšěch wobmjezowanjow
Berlin (dpa/SN). Předsydka SPD Saskia Esken stajnu šćěpjensku komisiju namołwja, swoje stejišćo nastupajo šćěpjenje dźěći přećiwo koronawirusej změnić. „Trjebamy nuznje šćěpiwo za dźěći, a nadźijam so, zo komisija wo swojim dotalnym nastajenju hišće raz rozmysluje“, rjekny Esken nowinarjam. Tež bayerski ministerski prezident Markus Söder (CSU) sej žada, zo dyrbjała šćěpjenska komisija šćěpjenje dźěći a młodostnych skónčnje poručić. To by škit wšitkich powjetšiło a generaciji, kotraž dyrbješe so tójšto přijomnosćow wzdać, swobodu wróćiło.
Šćěpjenska komisija njeje dotal šćěpjenje dźěći nad dwanaće lětami zasadnje poručiła, dokelž ma riziko ćežkeho schorjenja na koronawirus w tej starobnej skupinje za skerje snadne.
W zajimje wěstoty
Lěwica: Změna bjez wojakow
To a tamne (06.07.21)
Z runje jědnaće lětami studij fyziki zakónčił je Laurent Simons na Uniwersiće Antwerpen w Belgiskej, a to z najwyšim wuznamjenjenjom, kaž jeho nan wčera zdźěli. Pachoł trjebaše dobre lěto za maćiznu, za kotruž liča normalnje tři lěta. Kwantowa fyzika jeho wosebje zajimuje. Nětko chce hišće masterski studij zmištrować a potom doktorske dźěło pisać. Laurent je wulce nadarjeny a bě hižo z wosom lětami maturował.
Dlěje hač 35 lět bjez płaćiweje jězbneje dowolnosće z awtom jězdźił je 56lětny muž ze sakskeho Mockrehna, kaž so při wobchadnej kontroli wukopa. Tam policija zwěsći, zo bě muž wotydźenja časćišo z awtom na dźěło jězdźił a wužiwaše je tež za priwatne jězby. Jeho 1985 w bywšej NDR wupisana jězbna dowolnosć płaćeše pak jeničce za moped a traktor. Nětko drje ma z chłostanjom ličić.
Kardinal nětko sudnik
Vatikan (B/SN). Něhdyšeho prefekta kongregacije wěry, kardinala Gerharda Ludwiga Müllera, je bamž Franciskus 21. junija na pjeć lět za sudnika na Najwyšim cyrkwinskim sudnistwje Japoštołskeje signatury powołał. Potrjecheny ma rozsud bamža za znamjo dowěry. Kardinal Müller bě dotal profesor za dogmatiku na Mnichowskej uniwersiće a njeje w cyrkwinskim prawje wukubłany. K nadawkam japoštołskeje signatury słuša rozsudy druheho najwyšeho cyrkwinskeho sudnistwa w Romje přepruwować. Mjez bamžom Franciskusom a kardinalom Müllerom je w zašłosći k rozestajenjam wo moralnoteologiskich prašenjach dóšło. Tež nadawki kurije nastupajo staj wonaj rozdźělneho měnjenja.
Rozmysluje wo wotstupje
Kralowski wopyt w Berlinje
Berlin (dpa/SN). Nižozemski kralowski porik je dźensa na statny wopyt do Berlina přijěł. Willem-Alexander a Máxima wostanjetaj tři dny w zwjazkowej stolicy. K zahajenju witaše jeju zwjazkowy prezident Frank-Walter Steinmeier z wojerskej ceremoniju před hrodom Bellevue. Nimo politiskich rozmołwow steja tež wopyty kulturnych a wědomostnych institucijow na programje. Je to prěni statny wopyt wobeju w Němskej.
Orbán „njepřećel“ žurnalistow
Berlin (dpa/SN). Organizacija Reporterojo bjez mjezow wjedźe na swojej prawidłownej lisćinje „Njepřećeljo nowinarskeje swobody“ prěni króć tež knježerstwoweho šefa z Europskeje unje: madźarskeho ministerskeho prezidenta Viktora Orbána. „Po tym zo je Orbán ze swojej stronu Fidesz lěta 2010 móc přewzał, su woni madźarsku medijowu krajinu krok po kroku pod kontrolu přinjesli“, rěka w dźensnišej zdźělence zjednoćenstwa žurnalistow.
Wulke njewjedra zachadźeli
