Wěsće hišće, kak je so zasadźenje Zwjazkoweje wobory w Afghanistanje zapo­čało? Po terorowych nadpadach w New Yorku 11. septembra 2001 bě tehdyši prezident USA George W. Bush Afghanistan nadpadnyć dał, dokelž běchu kraj jako žórło terorizma identifikowali. Němska so po wobzamknjenju zwjazkoweho sejma na iniciatiwu tehdyšeho knježerstwa SPD a Zelenych ze zwjazkowym kanclerom Gerhardom Schröderom (SPD) kónc samsneho lěta přizamkny. Sčasami bě hač do 5 300 němskich wojakow w Afghanistanje zasadźenych. Njezapomnite je tež wuprajenje tehdyšeho zakitowanskeho ministra Petera Strucka (SPD), zo „wěstotu Němskeje tež pod Hindukušom zakituja“. Po 20 lětach z 59 mortwymi němskimi wojakami a dwanaće miliardami wudatych eurow je akcija skónčena. Fachowcy nałožowane mocy a wužitk zasadźenja zawěsće pruwuja. Tak derje kaž wěste pak je, zo talibanojo bórze zaso do afghaniskeje stolicy Kabula zaćahnu. Marko Wjeńka

Awto zemrěteje britiskeje princesny Diany je muzej w Chile kupił. Ford Escort bě na wčerawšim internetnym přesa­dźo­wanju přeličene 61 145 eurow wunjesł. Diana bě awto 1981 jako dar k slubej wot princa Charlesa dóstała a wopytowaše jeho­ z Fordom často k polo-hram. Pozdźišo wona awto fanej předa. Diana, ko­traž­ bě 1997 při njezbožu z awtom w Parisu žiwjenje přisadźiła, by jutře, 1. julija, 60. narodniny swjećiła.

Njewšědna spowědź: Njeznaći paduši su cyrkwi w Dormagenje swoju rubiznu wróćili a so z listom pola wosady zamołwili. Kaž policija zdźěli, běchu paduši mi­nje­ny tydźeń swěčnik a jedyn z wo­bra­zow křižoweho puća pokradnyli. Woboje ležeše nětko derje zapakowane zhromadnje z listom před cyrkwju. Pakostnikaj prosytaj wo wodaće za njeskutk, kotryž „sta so pod šwarnym wliwom alkohola“. Policija jeju nětko prosy, so tež pola njeje wosobinsce „wuznać“, štož móhło jimaj při chłostanskim jednanju pomhać.

Sakska dźěła dale za elektrifikaciju železniskeje čary Drježdźany–Zhorjelc

Budyšin (SN/at). Łužicu ze spěšnym ćahom­ z Berlinom zwjazać bě jedna z hłownych myslow, čehoždla je sakske knježerstwo nastupajo zwjazkowe srědki za strukturnu změnu po kóncu wudo­bywanja brunicy dwukolijowemu wu­twarej a elektrifikaciji železniskeje čary Berlin–Choćebuz–Běła Woda–Zhorjelc přihłosowało. Wulkoprojekt steji na lisćinje naprawow Zwjazka za łužiski rewěr. W tymle pakćiku strukturneje změny njezakótwjeny projekt elektrifikacije zwiska Drježdźany–Zhorjelc pak ma hinaši status, a to we wobłuku bliskowobchada. Ministerski prezident Michael Kretsch­mer (CDU) je postupowanje wčera před nowinarjemi w Budyšinje zakitował: Bychu­-li ćahi po tuchwilnej trasy pod jězbnym grotom jězdźili, bychu wone pjeć do dźesać mjeńšin spěšniše byli. Zaměr­ po słowach Kretzschmera ma wukmanjenje ča­ry­ za wobchad ICE ze 160 km/h być. Za to su korektury na přeběhu trasy trěbne. Wo tym budźe kraj ze Zwjazkom rěčeć. Wuchadźišćo je zawjazk ze zrěčenja Němskeje z Pólskej z lěta 2003.

Běła Woda (AK/SN). Dołhodobnje a na přichod wusměrjene ma město Běła Wo­da­ na strukturnej změnje we łužiskim rewě­rje wobdźělene być. To podšmórny sakske ministerstwo za regio­nalne wu­wiće. We wobłuku zjednorje­neho jednanja za Saksku móžachu ty­dźenja prěnje tři projekty strukturneje změny w komunalnym nošerstwje přizwolić, kotrež na zakładźe zakonja wo sylnjenju struktury spěchuja. Cyłkownje 6,1 milion eurow přewostaja Sakska natwarna banka (SAB) za projekty w Rackwitzu, Běłej­ Wodźe a w Torgauwje. „Předewzaća sylnja hospodarske stejnišćo kaž tež nałožo­wane slědźenje a technologiski transfer w regionje, wone spěchuja turizm a zdobom wobydlerjej bliske a na serwis wu­směrjene zarjadnistwo“, zwurazni statny minister za regionalne wuwiće Thomas Schmidt (CDU).