Berlin (dpa/SN). Po informacijach zwjazkoweje ministerki za justicu a swójby Christiny Lambrecht su jednanja wo zakótwjenju prawow dźěći w Zakładnym zakonju za tuchwilnu wólbnu dobu zwrěšćili. Kaž politikarka SPD wčera wječor zdźěli, je wona hłuboko přesłapjena. Do toho běchu so zakónčace rozmołwy ze zastupnikami frakcijow zwjazkoweho sejma bjez wuspěcha skónčili.
Unija a opozicija wumjetowaštej Lambrecht pobrachowacu wolu k dojednanju. „To je wosebje škoda, dokelž běchmy so nimale hižo dojednali, tajku składnosć tak spěšnje wjace njezmějemy.“
Za změnu Zakładneho zakonja je wjetšina dweju třećinow trěbna, čehoždla trjeba koalicija CDU/CSU a SPD podpěru wažnych dźělow opozicije.
Organizacije za škit dźěći sej mjenowanu změnu hižo wjele lět žadaja. Ze zapisanjom do Zakładneho zakonja, tak argumentuja přiwisnicy reformy, bychu prawa dźěći wjele wjetši wuznam měli, na přikład planowanje hrajkanišćow w bydlenskich štwórćach nastupajo.
Magdeburg (dpa/SN). Sociologa a slědźer na polu ekstremizma Matthias Quent nima wólbny wuslědk AfD při wólbach Saksko-anhaltskeho krajneho sejma za wuraz protestnych wólbow. Njejedna so wo protest přećiwo socialnym njedostatkam, ale wjele bóle wo protest přećiwo liberalnej demokratiji scyła, rjekny Quent powěsćerni dpa. „21 procentow ludźi je prawicarskoekstremnu stronu woliło, kotraž je w Saksko-Anhaltskej woprawdźe wosebje ekstremna w cyłoněmskim přirunowanju.“
Z mašinskej třělbu w rukomaj zadźeržachu ukrainscy hranicarjo w lěsu dweju kolesowarjow z Düsseldorfa, kotrajž běštaj z Pólskeje do kraja přijěć chcyłoj. Mužej w starobje 21 a 36 lět běštaj po puću do Thailandskeje. Wonaj z toho wuchadźeštaj, zo je Ukraina čłon EU a zo njetrjebataj namjezny přechod wužiwać. Při nócnej jězbje po lěsu je wšak na mjezy alarmowa připrawa reagowała. Hač smědźeštaj wonaj dale jěć, njeje znate.
Mjaso lubowacy paduch je w posaarskim Homburgu grilowanske twory z awtomata kradnył. Kaž policija w swojej rozprawje pisa, bě njeznaty skućićel škleńcu awtomata rozbił a mjaso a kołbaski w hódnoće 250 eurow spakosćił. Wón pak zawostaji cedlku, na kotrejž je so za swój njeskutk zamołwił.
Drježdźany (B/SN). Židźa, křesćenjo a muslimojo su so minjeny měsac w Drježdźanach k zhromadnej modlitwje wo měr w Jerusalemje zetkali. Bě to znamjo dorozumjenja a měrliweho zhromadneho žiwjenja. „Stejimy za demokratiske zakładne hódnoty a za lubosć k blišemu“, podšmórny rabiner Akiva Weingarten. Na mjezynabožinskej modlitwje wobdźělichu so dale ewangelskaj superintendentaj Alfred Nollau a Christian Behr kaž tež katolski farar Norbert Büchner, wšitcy z Drježdźan. Přitomny bě tohorunja kantor židowskeje wosady Zhorjelc, Alex Jacobowitz. Muslimsku stronu zastupowaše Saad Elgazar, Drježdźanski imam.
Na rozbuchnjenje dopominali
Köln (dpa/SN). Japoštołskaj wizitatoraj Andreas Arborelius ze Stockholma a Hans van den Hende z Rotterdama staj dźensa do Kölna dojěłoj, kaž rěčnica biskopstwa powěsćerni dpa wobkrući. Nowinarska konferenca njebě planowana. Biskopaj mataj w nadawku bamža Franciskusa „móžne misnjenja swojeje eminency, kardinala Woelkija“ přepytować a wotpowědnu rozprawu zdźěłać. Planowane su rozmołwy ze zastupjerjemi woporow splažneho znjewužiwanja.
Opozicija ze swójskej rozprawu
Berlin (dpa/SN). Zastupnicy opozicije w přepytowanskim wuběrku nastupajo jebanja w bywšim předewzaću Wirecard chcychu dźensa swoju rozprawu předstajić. Powšitkownje wočakowachu raznu kritiku nastupajo dźěło zwjazkoweho knježerstwa a předewšěm financneho ministra Olafa Scholza (SPD). Mnichowska firma Wirecard bě 2019 přiznała, zo njehodźi so 1,9 miliardow eurow z bilancow hižo namakać. Slědowaše insolwenca. Wuchadźeja z toho, zo bě firma wot lěta 2015 swoje bilancy masiwnje falšowała.
Lěkarjo: Přewjele njewočakować
Berlin (dpa/SN). Organizacija Němska wobswětowa pomoc ma wusud Europskeho sudnistwa z minjeneho štwórtka přećiwo Němskej přewulkeho zanjerodźenja powětra přez dusykowe dioksidy za hórku poražku zwjazkoweho knježerstwa. Zwjazkowy jednaćel organizacije Jürgen Resch rjekny w Berlinje: „Sudniske zasudźenje zwjazkoweho knježerstwa přez najwyše sudnistwo Europy je razna plista dieselowym lobbyistam na knježerstwowej ławce.“ Wobswětowa pomoc žada sej spěšne konsekwency. K tomu słušatej mjez druhim spěšny přetwar wobchadnych płonin na škitane kolesowarske šćežki a přetwar dźesać milionow dieselowych awtow na kóšty twarcow.
Berlin (dpa/SN). Tydźeń do wjerška NATO w Brüsselu je generalny sekretar sewjeroatlantiskeho pakta Jens Stoltenberg Rusku namołwjał so zetkać. „Chcu Rusku znowa přeprosyć, so bórze na posedźenju rady ,NATO-Ruska‘ wobdźělić“, rjekny Stoltenberg němskim nowinarjam. „Mamy tójšto wobrěčeć, štož je w našim zhromadnym zajimje.“ NATO bě Rusku hižo před lětom na nowe zetkanje přeprosyła, njeje pak na to žanu pozitiwnu wotmołwu dóstała, Stoltenberg wobžaruje. „Nětko dyrbi so Ruska hibać.“
Radu „NATO-Ruska“ běchu lěta 2002 załožili, zo bychu Moskwu wušo do dźěła transatlantiskeho zakitowanskeho zwjazka zapřijeli a dowěru mjez bywšimi přećiwnikami wutworili. Konflikta na wuchodźe Ukrainy dla bě dialog wot 2014 do 2016 přetorhnjeny. Po tym je so rada jenož hišće njeprawidłownje schadźowała. „Poćahi mjez NATO a Ruskej su mjeztym dypk docpěli, kajkiž njejsmy po kóncu zymneje wójny wjace dožiwili. Dialog, hdyž sedźa wšitcy za jednym blidom, wostanje tuž najlěpši puć.“
Magdeburg (dpa/SN). CDU saksko-anhaltskeho ministerskeho prezidenta Reinera Haseloffa je wčerawše wólby tamnišeho krajneho sejma z wulkim wotstawkom dobyła, a tak dobre tři měsacy do wólbow zwjazkoweho sejma tež kanclerskeho kandidata CDU Armina Lascheta zesylniła. AfD móžeše swoju poziciju jako druha najsylniša najebać mjeńše straty zakitować. Zeleni su so jeno snadnje polěpšili. SPD a Lěwica sunyštej so na nowe rekordne špatne wuslědki. FDP so nětko po dźesać lětach zaso do krajneho sejma nawróći.
Na nakładnym ćahu k Baltiskemu morju po puću była je 27lětna žona z Čěskeje. Swědcy běchu železnicu wo tym informowali, kotraž na to policiju alarmowaše. Zastojnicy ćah pola braniborskeho Hohenleipischa zadźeržachu a namakachu 27lětnu pod planu. Žona přizna, zo bě w Bad Schandauwje na ćah do Rostocka zalězła. Tam chcyše dźeń při morju wostać a so na samsne wašnje domoj podać. Nětko dyrbi wězo pokutu płaćić. Zwotkel bě wědźała, zo ćah do Rostocka jědźe, a hač tomu scyła tak bě, policija njezhoni.
Nócne wołanje dweju skalneju wiwkow (Steinkauz) je w posaarskim St. Ingberće zasadźenje policije zawiniło. Ludźo sej myslachu, zo reaguje alarmowa připrawa na paduchow, a wołachu policiju. Njebě pak wjace hač wołanje ptakow, štož klinčeše woprawdźe kaž zwuki alarmoweje připrawy, samo zastojnicy wobkrućichu.